Read Mayangna Salmos 40 Bible Online

Salmos 40 - Mayangna bible

Salmos 40

¹Coro sumalniyang kaupak, Devid salnimo. Yang tahanik kidika Dawan yakat ātik dutayang, dawak witing abukwi yadakana sarahtayang kidika;

²daunin pāni sulihni kaupak yalaihwi yakna, wasmak payakat āwik yawinikdai kidika kaupak yalaihwi yakna, Yang kalki balna kidika kipala minit yakat yadukiwi ilna; dawak lapaktayang balna bik parasni yana.

³Yamwakat yang kungkimak kaupak unbaunin wisam as kalahna, unbauwi ayangni nuhni yamnin as, Mapapangki kau. Muih mahni adika tatalna mani kat isningna yakat diusna dai dawak Dawan yakat yamni kalkukulna dai.

⁴¡Isninglak ki angdika alni, Dawan yakat kulnin āwi duwa kidika dawak muih, witingna manah kapat kaldakakawa balna yakat walwasdai bahang dawak bik dawan dauh balna yakat bik minitna yuyulwasdai bahang![26]

⁵Dawan dawak yang Papangki, di taldas dini balna kidika manas yamnaman dawak maikultaman kidika bik. ¡Uk diski man karak kal-libitnin kidika! Yulkih yawi, kidika dini balna, kauna mahni palni ki, yang yulbauki kidika karak dawakat.

⁶Sakripais kidika yaklauwi alasna mayakwas ki dawak plawar minik duaiwi mawa kidika bik alasna mayakwas ki, dawak sakripais buswi manin bik yultasman dai, kaput bik laih minitdis kalanin dini kidika bik yultasman dai, muih dutni yamna kidika disdana atnin yulni. Nawatkauh laih tapaki apahta yanaman di dakanik.

⁷Kidika bahang yulnayang: Akat sakyang, wauhtaya yakat yang yulki ulna kaput.

⁸Yang laih man dukih mawa kidika yamkih yawi, yang Papangki; ¡sumalnaman balna kidika ising yakat duyawayang!

⁹Man tawanma muihni mahni balna muhninatani yakat niningnakana yang la barangni kidika. ¡Dawan man yamni amanglataman, yang ap datasyang dai!

¹⁰Yang ap datasyang dai, man la kat yamtaman yulni kidika; man barangniman kidika dawak laihta yaktaman kidika bik yulnayang. Man dalani lani dutaman kidika dawak di rahm yultaman kidika bik maltasyang dai man tawanma mahni muhni yakat.

¹¹Dawak Dawan man laih, ¡minikun talnin lani dutaman kidika yangkaupak laihwatwinih! ¡Nining ban kaput nakitdakna karang, man dalani lani dutaman kidika, dawak di rahm manah yultaman balna kidika karak!

¹²Kat di dutni manas yang munah bayayakna bahang kidika dini balna sip kultik talasyang mahni ampusdaipa. Yang silp dutki balna yaklauwi yalalaihna; ¡dawak mikpa balna bik di talas danayang! Yang tunaki kau baski balna karak dawak tanit mahni, dawak kulnik bitik parasni dis dana.

¹³Dawan plisma, ¡aiwa yalaihta yaktah! Dawan, ¡sirihni aiwa ilpki awah!

¹⁴¡Witingna kidika niningnakakarana karang, yang sangkika dispamnin kukulwa muihni balna kidika!

¹⁵¡Yakasaldi kikirang yang kau sarahni yayuyulwa muihni balna kidika!

¹⁶Kaunah muih bitik man yakat mawawalwa muihni balna kidika alasna manah dibahng-ilwang; man lawa dilaihta yaknam kukulwa balna kidika witingna ninihng ban kaput yuyulwang: “¡Dawan kidika laih nuhni!”

¹⁷Dawak yang laih mikunni dawak kulnik bukna adika, damatkahwinih yang adika Dawan. Man kuduh ilp yataman, dawak yalaihta yaktaman; ¡baisa nai watwinih yang Papangki!