Read Mayangna Salmos 41 Bible Online

Salmos 41 - Mayangna bible

Salmos 41

¹Coro sumalniyang Kaupak, Devid salnimo. Yamni palni ki, angdika muihni parasni dis minikunni yakat kulwa muihni kidika; Dawan yaklauwi ma dutni balna kaupak laihwi yakna karang.

²Dawan yaklauwi nanitdakna karang, witing yaklauwi sangnika kalana karang, dawak isning alasna lani bik kalana karang sau akat dawak waihnila balna yaklauwi ting kalyayamwa kidika paskaupak kalruhmwi dawas karang.

³Dawan yaklauwi parasni kalawarang, witing kalangwa pāni kau dalani duwa kidika; ¡siknis kidika kaupak muihni yamni kalyamna karang!

⁴Yang yulnayang: “Dawan, mikun yatalah; sikkinis kaupak yāyamtah, man namangyakat dutni yamnayang kaunah.”

⁵Waihkila balna kidika dutni palni alahwing talnin kukulwi: “¿Mampat dauwarangyah, dawak kulnin lani balna kidika diswarangyah?”

⁶Yatalna aiwi, kauna witingna kulninna yamni awaski; witingna kulninna yakat di dutni bitik duduwi, tapas yakat kalalahwa yakat lāih yayakwi.

⁷Dutni yakukulwa muihni balna kidika kalpakwi yang yulkibabauwi; witingna kukulwi yang wauhtayang dutni yamnayang bahang,

⁸dawak yuyulwi: “Witing sikninis kidika laih walasa yaklauwi kalyamwi; pa yakat bukna bahang watwi laih yaklauwas karang ki.”

⁹Kaltalyang tanit yamni dai kidika yakat kalkultayang dai kidika, dawak yang karak dikaswa dai kidika, yang nikingkauh yaklauna.

¹⁰Kaunah man laih Dawan, mikun yatalah; yatangkat lawik minitna diakuh.

¹¹Yang kidika yakat amanglaki man muhma yakat yamni yatalnaman kidika: dawak waihkila kidika niking yakat yulwas karang, mikit bayakna.

¹²Dawak yang laih dutni as bik yamtasyang sangkika akat, bahang tingma yakat yadutah, dawak man muhma tani yakat ban yadutah.

¹³¡Dawan kidika ayangni nuhni yamna karang, Israel Papangni, warmani kaupak ban kaput karang! ¡Nining ban kaput kawang!