Read Mayangna Salmos 42 Bible Online

Salmos 42 - Mayangna bible

Salmos 42

¹Coro sumalniyang kaupak. Coré walanibis balna yulnina damni. Sana was dikih kalawak was walwa kapat, kaput yang Papangki, man yakat mawaltayang. Coro sumalniyang kaupak, Walanibis balna yulnina damni.

²Papang kidika dukih yawi, sangka atnin Papangni kidika. ¿Mampatkat Papang muhni yakat wattik lawakiyah?

³Pukta madah, yang kasnik kidika laih mikwas, awar bitik yakat yayulwi dakakawi: “¿Angkat sakyang man Papangma?”

⁴Adika dini yakat kultingkat, yadalawa balna bitik watwi yadalawi muihki yakat. Isingkatwi, yang muih karak kalpaktik yawayang dai kidika, Papang uni yakat alasna sarahtayang tingkih yultayang dai kidika. ¡Alasna nuhni ampus awadaih!

⁵¿Amput dawak kulnik kidika sau yakat bukwarangyah? ¿Amput dawak ising abahlwarang yah? Yang tahanik kidika Papang yakat ānayang sakki baisa witing yakat ayangni nuhni yamki. ¡Witing laih Papang, dawak bik laihwi yayakyang ki!

⁶Kulnik uba sau yakat bukna kaldakayang. Kidika bahang uba man yakat kultayang Jordán wasni kidika sauni pīsni kaupak, Hermón dawak Mizar asangni balna kaupak.

⁷Sau wakarhni kudungni kidika kaupak dakana ki was wakarhni makaupak utuhwi kawak; was parasni murwa balna man sihtaman kidika yang mikitmunah bayakna.

⁸Madah yakat Papang kulnin dalani kidika yasihwi, pukta yakat yang laihwattas unbautayang dawak mikit yultayang kidika, sangka Papangni yakat.

⁹Papang yang nakitdakyang yakat kalyultayang: “¿Aisyamta yadatang damatkahnayah? ¿Amput dawak kulnik bukwak lik-atnikyah waihkila balna yatataihwakat?”

¹⁰Wakalki balna bitik yadalawi waihkila balna yauhuswa kidika yulni, dawak awar bitik yakat yayulwi dakakawi: “¿Man Papangma angkat sakyah?”

¹¹¿Amput dawak kulnik kidika sau yakat bukwarangyah? ¿Ampadawak kulnik abahlwak sak-awakiyah? Yang tahanik kidika laih Papang yakat ānayang sakki, witing yakat baisa ayangni nuhni yamki kidika. ¡Witing kuduh yang Papangki, dawak laihwi yakyang kidika!