Read Mayangna Salmos 44 Bible Online

Salmos 44 - Mayangna bible

Salmos 44

¹Coro sumalniyang kaupak. Coré walanibis balna yulnina damni. Papang, yangna tapakina kau dakanayangna, dawak papangkina balna yaklauwi yanayuyulna man yamnaman balna dai kidika witingna manina balna dai yakat kidika mani balna bayakwi kaina yakat:

²man tingma kau, laihta yakmukta man yakat makukulwas muihni balna kidika, dawak wah dianaman muih balna yakat dawak kidika yakat yangna papangkina balna panina dianaman dai.

³Witingna tingnina dawak isninaparah kidika yaklauwi laih minit bayaknin kidika diawasdai; kidika sauni witingna kalbauwi minit bayakwi laihwi duduwasdai. ¡Man parasma kidika yaklauwi kaput yamna dai! ¡Man parasma yaringni kidika yaklauwi yamna, kat man lawa dalani diataman dai bahang!

⁴¡Yang kingki! ¡Yang Papangki! Man lawa tawanma yakat minit bayaknin kidika kalanaman dai;

⁵man lawa mayatangkat waihkinala balna yakat minit bayaknayangna; ¡man ayangma kau taihtik laknayangna, nikingna kauh yaklalauwa balna dai kidika!

⁶Kat yang laih sip laski yakat kulnik ātik dutas awaki; dawak iskiparah bik yaklauwi minit bayaknin kidika yāwas karang ki;

⁷man lawa mayatang kat waihkinala balna minitna yaknayangna, man lawa asalnina yaknaman yangna kau dutni yanakukulwa balna dai yakat.

⁸¡Man yakat yangna manah kapat kaldakanaki, Papang, man ayangma nuhni yamtayangna kidika ban karang!

⁹Kauna yanadutas danaman; dawak asalkina manah kalahna. Yangna kalbaunin muihni balna dutayangna kidika karak kalpakta alahwasman.

¹⁰Yanayamtang kat waihkinala balna niningna yakat dangbahnayangna; dutni yanakukulwa balna kidika yaklauwi dikina mamalwi, dawak ais duwi uinin kukulwa kidika duwi uiwi.

¹¹Tingnina yakat yana-ānamana sihm sīp balna īnin pāni yakat duwi uiwa kapat; man kau makukulwas muihni balna pasningna yakat yanaruhmna man;

¹²tawanma kidika wauhta bakannaman minit dibin palni, wauhta bakanpamna man kidika kaupak di as bik minit yakat lata dutasman.

¹³Yana-usnit dini as kapat yakat yanawirlana man; yangna yaihkitna kau muihni balna kidika yana-uhuswi dawak sarahni yanatalwi nikingna kakari.

¹⁴Yamtangkat man kau makukulwas balna kidika yaklauwi sarahni yanayuyulna yangna akat; yanatalwi, tunanina kidika lababahnwi sarahni yanatalwi.

¹⁵Minit as bik diski yangna sau yakat buktas atnikna kidika; muhki kidika sau yakat bukna asalni manah

¹⁶waihkila yaklauwi biri yayamnin kulwa kidika yulni yausna ki dawak dutni yayamna ki.

¹⁷Adika dini yanakalahwada kidika laih man kidika dikitnakahna tanka laih awaski. ¡Man pramamis yakat yamtasyangna laih awaski!

¹⁸Yangna kultasyangna dai maruhmtik danikna dawak tama bik datasyangna.

¹⁹Kaput kauna, man lawa yanataihta sikitna man di dis pāni yakat.[27] ¡Puksani yamadangni yanamuklakna man!

²⁰Man kidika dikitnakahna katlaih, Papang, man pama yakat dawan dauh yakat ayangni nuhni yamnayangna katlaih,

²¹man amanglatitimdai, kat man laih di tanit malnikau kidika bik talaman bahang.

²²Kauna man yulma ban aput yangna, daunikna manah; yangna adika yanayayamwi sihm sīp balna inin yayakna kau diyayamwa kapat.

²³¿Aisyamta amamahn Dawan? ¡Sahmuta, sahmuta! ¡Yanaruhmwi ban kaput atnin yakat!

²⁴¿Ais yamta maldamanh? ¿Ais yamta yangna adika datang damatkahwih, yangna uba wauhtayangna adika?

²⁵Yangna sip-awas kalnayangna dawak sau yakat buknayangna, yangna muihkina adika sau yakat murtayangna.

²⁶¡Lawah dawak aiwa ilp yanatah dawak yanalaihta yaktah dalani lani nuhni dutaman kidika kau!