Read Mayangna Salmos 46 Bible Online

Salmos 46 - Mayangna bible

Salmos 46

¹Coro sumalniyang kaupak. Coré walanibis balna bara kau unbabauna. Papang kidika laih mayang mamaldinik pāni, dawak bik mayang maparaski; mayang ma ilpki makulnik kaida mani balna yakat.

²Kidika bahang yamadudas karang, sau adika diswarang bik, dawak asang nunuhni balna kidika kuma tuhni yakat uiwarang bik,

³kuma kidika parasni yulwi dawak nunuhni lalamwarang bik, asang balna kidika diyukwarang bik kuma anwa kidika yulni.

⁴Was tingni as kidika yaklauwi Papang tawanni kidika alasna yakwi, Papang tawan nuhni tanit maisihnidis kidika.

⁵Papang laih kidika pasyakat sakki, bahang tingnikau laihwi dulauwarang; Papang yaklauwi ilp kalawarang mahka ma payahlawakat.

⁶Muih balna kidika ihiwi; dawak king sauni balna kidika diyukwi; sau adika pini diswi, parasni yulwa kidika dakawarang kat.

⁷¡Dawan pasni nuhni duwa kidika mayang karak ki! ¡Jacob Papangni kidika yakat mayang mamaldinik pāni dudi!

⁸Aiwa di taldas dini kidika talah Dawan yaklauwi sau akat yamna kidika;

⁹war kalbaunin kidika dahn yamna sau bitik yakat; las balna kidika bitik laih bahna; dawak sangka balna bik bahwi bikis dana, ¡kalbaunin kārni balna dai kidika kuhpau kau busna!

¹⁰“¡Sip-awas alahwanauh! ¡Amanglatanauh, yang laih Papangyang! ¡Yang laih sau muihni balna minitna yakat sakyang! ¡Kaput bik sau bitik minityakat yang sakyang!”

¹¹¡Dawan parasni nuhni duwa kidika mayang karak ki! ¡Jacob Papangni kidika yakat mayang mamaldinik pāni dudi!