Read Mayangna Salmos 49 Bible Online

Salmos 49 - Mayangna bible

Salmos 49

¹Coro sumalniyang kaupak. Coré walanibis balna Salninamo. Adika yamni dakanauh, tawan dawak sau muihni balnamana bitik,

²di duyang balna dawak muih miniknakunni balna bik, parasni nuhni duyang balna dawak parasni dis limahni balna bik.

³Sins lani karak yulbauki ki, dawak kulnin tuhni balna karak yulbauki ki;

⁴sins lani balna yakat yamni talki, dawak di malnikau dutayang balna kidika, paswi yakisdinin karak yulki.

⁵¿Ais yamtik yamaduki yah ma dutni balna kidika kaiwakat, dawak ya-awaihdakwakat yang waihkila balna dutnina[29] kidika yaklauwi?

⁶Witingna laih di manas duduwa yakat kukulwi, dawak yulnin, dawak ayangnina nuhni dulalauwi di yayamni manas duduwa bahang,

⁷kauna muih as bik alas kal-laihwi yakwas ki[30] dawak Papang yakat bik sip lauwi kalawaski sangnika laihwi yakna atnin.

⁸¡Lalah as bik diski muih al sangnika kidika bakanwi yakna atnin,

⁹kaput ban sangka atnin, daunin kaupak yaklana atnin!

¹⁰Kat laihki muih bitik laih kapapat dadauwi, sins mutu balna dadauwa kapat sins duyang balna bik dadauwi dawak dinina balna kidika watwak muih ūk balna duduwi.

¹¹Saunina kidika witingna ayangnina kau papakna karang bik, sau ū[31] kidika laih witingna ūnina ban kaput karang ki; ¡witingna kidika yakat wawatna karang ban kaput atnin!

¹²Muih al laih ban kaput awaski, di mahni duwarang bik, sihm di ūk balna dadauwa kapat dadauwarang ki.

¹³Kaput dahn kakalwi, witingna alas muihnina yakat kulyang balna kidika; dawak kaput bik dahn kakalwi alas ayangnina nuhni yayamwa kidika.

¹⁴Kidika muihni balna niningna yakat laih, daunin kidika taninatuna kawi sau ū yakat didukiuna ki sihm sīp balna kapat. Mapiris payahlawak, muih yayamni balna yaklauwi minitna bayayakna karang, parasnina kidika dis kalwarang, dawak sau ū kidika witingna ūnina karang.

¹⁵Kaunah Papang yaklauwi daunin kaupak yalaihwi yakwarang, dawak witing karak yaduwi kiwarang.

¹⁶Muih as di duyang kalwakat, ismang irikwinih witing ūni kidika di yaksihni manah āwakat,

¹⁷kat dauwarang kat di as bik duwi kiwas karang ki, di yaksihni balna kidika sauni ū yakat uiwi kiwas karang ki.

¹⁸Sangka mani balna yakat isninglak dakawarang, dawak muih yaklauwi ayangni nuhni yayamwarang di duwa kidika yulni,

¹⁹dawak daunin mani kidika witing yakat kal-laihwarang ki, dawak ma yaringni kidika talwas dawarang ki.

²⁰Muih kidika laih ban kaput awaski,[32] di manas duwa karang bik; sihm di sangnika ūk duduwa balna dadauwa kapat dauwarang ki.