Read Mayangna Salmos 51 Bible Online

Salmos 51 - Mayangna bible

Salmos 51

¹Coro sumalniyang kaupak. Devid salnimo, Prapit Natán yaklauwi bilna usnitkat Betsabé karak dutni yayamna kidika yulni. Papang dalani dutaman kidika kau, mikun yatalah yang akat; dawak bik minikun talnin dutaman kidika kau dutki balna usyaktah.

²¡Dutki kaupak yasuhta yaktah! ¡Kaput bik dutki kaupak maisihnidis yadatah!

³Yang amanglatayang kulnik kidika anyang dai; yang dutki balna kidika kulnik kaupak uswi kalahwas ki.

⁴Man namang yakat dutni yamnayang, man namang yakat manah, di dutni yamnayang, man lawa dutni talaman dini kidika. Kidika bahang man la yamtaman kidika laih barangni ki; dawak man la yamtaman kidika niningkauh yulnin sip-awas ki.

⁵Rahm kidika laih yang dutniyang, batahn danayang kaupak; dawak yang nanangki bānipas kaupak yang dutni muihni yang.

⁶Di rahm kidika, muih kulnin alas yuyulwas kidika dalani talaman, dawak kulnik pasyakau sins lani nuhni kidika yānaman.

⁷Dibasta walapni kidika kau yasuh'yaktah, dawak yang klin alahwaki; yasuhtah, bahang kaput laih yang tanit pihni kalki mukus karak dawakat.

⁸Alasna manah yabahngtah, watta alasna yatah, dalani yanaman kaunah.

⁹Yang dutki kaupak man mamakpa kidika latah, dawak dutki balna kidika bitik usta yaktah.

¹⁰Papang, ¡yang kulnik yakat ising maisihni dis as atah! ¡Dawak spirit wisamni barangni kidika yatah!

¹¹Yang kaupak yaklawinih, dawak spiritma holi kidika bik.

¹²Yatang kat, laihta yaktaman alasnina kidika dakakuh; spiritma kulnin yamni kidika kau yalaihta dulautah,

¹³kaput laih yang lawik kulninna dutni balna yakat man tama kidika niningnakanik dawak dutni yamyang balna kidika man yakat uina atnin.

¹⁴Muih īnin kidika kaupak yalaihta yaktah, Papang yalaihta yakyang man kidika, yang unbautinah man barangni kasak man kidika yulna awaki.

¹⁵Dawan, tikpas kidika kalatang wakahwang, dawak tikpas kau man yakat unbauki.

¹⁶Kat man laih dukih mawas ki sakripais busna kidika, yang laih maki, kaunah man dukih mawa kidika laih awaski.

¹⁷Papang yakat minitdis dini kalana kidika laih spiritni dalawa kidika yulni; ¡Papang ruhmwi dawinih, spiritni bahna kidika!

¹⁸Sayan yakat yamni kalyamtah, man kulnam yamni kidika kau; dawak Jerusalén daklana balna kidika watta laihta dulautah.

¹⁹Kaput laih sakripais balna kidika duma, tinglau kau sakripais buswa kidika, dawak minitdis kalawa kidika bik yamni bitik busna karang; kaput laih turuh almuk kidika sakripais busnin pāni yakat ilna karang.