Read Mayangna Salmos 56 Bible Online

Salmos 56 - Mayangna bible

Salmos 56

¹Coro sumalniyang kaupak, “Pa naikau daniwan dauh buhnituku” tiunni. Devid yulni damni, Gat sauni yakat Filistain balna kal-laihwak ulna kidika. Mikun yatalah, yang Papangki, muih yalaihnin ya-uhuiwi; awar bitik yakat yakalbauwi dawak yatataihwi.

²Awar bitik yakat waihkila balna kidika ya-uhuiwi yalaihna atnin; mahni palniki nikingkauh yakalbabauwa kidika.

³Yang yamadutayang kidika yulni, man yakat kulnik ātik dutayang.

⁴Papang yakat kulnik ātik dutayang, dawak yulni balna kidika nuhni yamtayang; Papang kulnik ātik dutayang, bahang yamadutasyang. ¿Ais yayamnin sipyah muih al kidika?

⁵Awar bitik yakat, witingna tunina kau dalani yayamwi; dutni yamnin kidika manah kukulwi.

⁶akat bik dawak kut yakat bik yakmamaldi, yauiwi uiwi, yaīna atnin yulni.

⁷¿Witingna alas dutnina kidika kaupak yaklalawarang katpah? Papang, man kulnam daukalna kau, tawan balna kidika sau yakat laktah.

⁸Yang watyapak irayang balna kidika kulta talaman; dawak mikwas balna bitik laih talaman. ¿Man wauhmataya yakat ulta dutasman katpah?

⁹Yang waihkila balna kidika naikau kalalahwarang man yakat ilp yulki kat. Yang amanglatayang Papang laih yangkarak ki.

¹⁰Dawan yakat kulnik ātik dutayang, dawak yulni balna kidika nuhni yamtayang;

¹¹Papang yakat kulnik ātik dutayang, bahang yamadutasyang. ¿Muih al kidika ais yayamnin sipyah?

¹²Pramis yamnayang kidika manyak Papang, ayangma nuhni yamnin kau yamna awaki,

¹³kat daunin kaupak yalaihta yaknaman bahang, kat yang kahrwak buknik kaupak yalaihta lanaman bahang, man sangmaka yaringni yakat lik-atnin yulni, Papang muhni tani yakat.