Read Mayangna Salmos 64 Bible Online

Salmos 64 - Mayangna bible

Salmos 64

¹Coro sumalniyang kaupak. Devid salnimo. Papangki, dutni dakik yultayang kidika dakah; sangkika kidika nanitdaktah waihkila yamadadangni balna kaupak.

²Muih dudutni balna kaupak yamaltah dawak witingna malnikau di yayamwa balna kidika kaupak bik; muih dudutni balna yaklauwi inin yayamwa kidika kaupak bik yalaihtayaktah,

³witingna tūnina kidika baini yayamwi isparah kapat dawak sibang kapat rurumhwi yul puisin duwa balna kidika.

⁴Yakmamalda pāni kaupak rurumhwi dutni yamwas muihni niningyakat; isningna aiwas kat rurumhwi dawak bik yamaduduwas.

⁵Biri kulninna dulalauwi dutni yamnin kidika yulni; yakmaldi laihna dini kidika ānin yayamwi dawak witingna kukulwi muih as bik ditalwas karang,

⁶dawak witingna dutnina kidika muih as bik walwi talwas karang. Kaunah kidika muihni laih sipki amanglanin muih al kulnin pasyakau bik, bahang laihwi talna karang.[36]

⁷Witingna silp sīninabang kidika kau Papang yaklauwi dibaswarang, isningna aiwas kat dibasna karang;

⁸witingna alas yulnina munah bubukna karang dawak wais ditalwarang kat sarahni diyulna karang witingna yakat.

⁹Kaput dawak witingna bitik Papang yakat ayangni nuhni yayamwarang dawak witing di yamna balna kidika yuyulwarang; kaput bik witing yamna balna kidika amanglalawarang.

¹⁰Muih al yamni kidika Dawan yakat alasna duwarang dawak witing yakat, nanitdaknin kidika walwarang, dawak muih kulninna yamni balna kidika bitik isningnalak kaldakakawarang.