Read Mayangna Salmos 65 Bible Online

Salmos 65 - Mayangna bible

Salmos 65

¹Coro sumalniyang kaupak. Devid salnimo dawak unbauna kidika bik. Sayan Papangni, ¡ayangni nuhni yamnin kidika laih man dīma palni ki!, ¡man yakat pramis yayamna kidika yakat yamnin ki,

²kat makatyulna kidika dakaman! Muih bitik kidika man yakat kiwi.

³Yangna dutkina balna kidika mikitna bayakwi, kaunah man lawa madutki balna kidika datang diswi.

⁴Angdika muihni man lawa yakta dutaman kidika, witing laih isninglak ki dawak man yaihmat yakat duyawang kat yalahwi, man ūma kau payahnin pāni balna yakat. ¡Man ūma kau di tanit yayamni balna kidika mahni palni kalatah, man ūma holi kidika kaupak!

⁵Papang, mayang mailaihwi yakyang, man lawa ma nangkitlata man la kat dawak taldas dini balna bik yamtaman; sau bitik laih manyakat kulninna āwi duduwi dawak kuma naikau kidika bik,

⁶man lawa asang balna kidika pānina kat dianaman man parasma kau.

⁷Man lawa ap dataman kuma parasni lalamwa balna kidika dawak tawan muihni balna kiriyaklalauwa kidika bik;

⁸pa naikau yalalahwa muihni balna kidika bik diyukwi, man, ditaldas dini yamtaman kidika niningyakat; man yulma muih alasna duwi papauhwi ma kilwa kaupak, ma kawa kat.

⁹Man sau kidika maintalaman; was sihtaman dawak yamtang di minik yakwi; man, was parasni murwa kidika kau kalatang plawar minik balna kidika barakwi. ¡Kaput pa kidika redi yamtaman!

¹⁰Kaput yamta sau kidika suihtaman dawak sau kidika sahta papat-dataman; dawak was parasni kalatang lauwak sau kidika yudutni yamtaman dawak minik balna kidika blisyamtaman.

¹¹Man lawa kurih kidika blismunta bungdataman mukusma balna[37] manas palni bukna ki;

¹²kauhmak wanilang kau sirh sirh balna kidika sangni yamni ki, dawak asang balna bik yaringni;

¹³langni balna kidika tinglau balna manah bungki, dawak langni maluih balna kidika laih plawar dahna manah ki; ¡bitik laih unbauwi alasna sararahwi!