Read Mayangna Salmos 66 Bible Online

Salmos 66 - Mayangna bible

Salmos 66

¹Coro sumalniyang kaupak. Salmu, unbauna. Papang yakat unbautanauh alasna ki, sau muihni bitik manakau;

²witing ayangni alasna yaksinh yakat unbautanauh; unbauta kalatanauh unbaunin yaksasinh yayamni kidika.

³Papang yakat kalyultanauh: “Man warkma balna laih di taldas tanit yayamni ki. Man parasma nuhni kidika kau man waihmala balna kidika muhma yakat muihsakdauwi bubukwi;

⁴Sau muihni balna bitik manyakat dalani palni matatalwi man ayangma yakat unbabauwi.”

⁵Aiwa talnauh Papang warkni balna kidika, muih ahal balna yulnina di taldas dini balna yamna kidika:

⁶kuma kidika sau buhni yamna, mamuihki bararak balna was kidika kalkau lapakwi dadakna; ¡alasna dudanang Papang yakat!

⁷Witing parasni kidika kau, ban kaput king kawi; witing nesān balna yakat mainditalwi, kaput laih muih dudutni balna kidika witing nining yakat yaklaunin-awas.

⁸¡Nesān balna, mayang Mapapangki yakat ayangni nuhni yamtanauh!, ¡kalatanangkat parasni yulwang unbaunin balna kidika!

⁹Kat masangkika kidika mayana bahang; maidawak bukdasdai.

¹⁰Mayang Mapapangki, man mailaihta talnaman, ¡lalah kapat maibusta klin maiyamnaman!

¹¹Mayatang kat laihnin dini yakat buknamayang; tikini maituruknaman.

¹²Maidatangkat muih pini mai-atatakna, yangna bayaknayangna was dawak kuhpau munah, kaunah witni kat mayatang maurupdana.

¹³Man ūma yakat āwik walapni buski manyakat; kaput laih yang prakimis kat yamki,

¹⁴yang pramis mayamnayang kidika yamadangni yakat sakkauna.

¹⁵Sakripais bustaman pāni yakat, tinglau salalani balna kidika busna awaki; turuh almuk dawak kuts bik mana awaki, kuts busna walapni yamni kidika.

¹⁶¡Mannabitik aiwanauh, Papang yamani dutamana kidika! ¡Yang manayulki kidika dakanauh yang yulki di yamna kidika!

¹⁷Yang tikpaskau, dawak tukikau kalyulnayang, dawak ayangni nuhni yamnayang.

¹⁸Yang kulnik dutni dutayang katlaih, Dawan kidika yadakawas kitdai;

¹⁹¡kaunah witing yadakana, dawak mikityulnayang kidika bik dakana!

²⁰¡Papang kidika ayangni nuhni yamna karang, yang mikityulnayang kidika rumhwi dawasdai dawak dalani lani duwa kidika yangkau yāwas awasdai!