Read Mayangna Salmos 68 Bible Online

Salmos 68 - Mayangna bible

Salmos 68

¹Coro sumalniyang kaupak. Devid salnimo dawak unbauna balna. Papang yaklauwi kalbauwakat, waihnila balna kidika kalsuhwi; witing yakat dutni kalkukulwa muihni balna kidika muhni tani yakat kikiri;

²wayau kapat wingyakat pini dislalawi, dawak balas kuhpayakat arwa kapat kakalwi; ¡Papang muhni tani yakat muih dudutni balna kidika bubukna!

³Kaunah muih yayamni balna kidika laih alasna duduwi; Papang muhni tani yakat alasna manah dibahngna, ¡alasna duwi susutwi!

⁴Manna Papang yakat unbautanauh, witing ayangni kau unbautanauh; ayangni nuhni yamtanauh, mukuskau kilwi kiwa[38] muihni yakat. ¡Alasna awanauh, Dawan yakat! ¡Witing kaiwa yakat alasna awanauh!

⁵Papang witing ūni holi yakat yalahwa kidika, kidika laih warau balna papangnina dawak tingmak balna nanitna dakyang;

⁶Papang yaklauwi pānina diawi, muih alas balna yakat silak muihni balna kidika laihwi yakwi dawak diawak di manas duduwi; kaunah muih kulninna dutni balna kidika laih sau dutni yakat ban karang.

⁷Papang, man tawanma tanituna yakat alahwanaman kat kauhmak wanilang munah lapakta,

⁸sau kidika yuknadai, dawak makau kisang kidika kaupak waslauna dai, Sinaí kidika yuknadai Papang muhnitani yakat, Israel Papangni muhnitani yakat.

⁹Papang man lawa yamtang, was mahni launa man sauma buhlana kidika watwi parasni duna atnin yulni.

¹⁰Man tawanma laih kidika yakat kiwi pāni duna dai dawak man, Papang, minikun talnin lani dutaman kidika kau muih minikunni yakat kalanaman dai dukih kalawa balna kidika.

¹¹Dawan yulni kidika sihna dai dawak yayal manas laih kidika yulni sumamalna dai:

¹²“¡King balna kidika kikiri, witing kalbauyang muihni balna duwa kidika yakarak kalpakwi!” Unina balna yakat, yayal balna yaklauwi sahyayakwadai waihla balna kaupak di dakyayakna dai kidika,

¹³kaunah manna laih maldanamana dai. ¡Buhtuku lawani lalah manah! ¡Butuni balna kidika gol manah!

¹⁴Parasni nuhni duwa kidika yaklauwi yamwak king balna kidika kikirana Salmón asangni tuna yakat was dadasna uhwadai.

¹⁵¡Basán asangni balna kidika ampus maluihniyah, dawak asangni tuna kidika ampus maluihniyah!

¹⁶Manna kidika, asang malaihni mana kaunah, ¿ais yamta tumta talamanah mamaknapa kau kidika asangnituna yakat Papang yalahkuh atnadai kidika? ¡Dawan laih yakat ninihng ban kaput yalahna karang!

¹⁷Papang, witing kalbaunin karni balna duwa kidika laih milian, milian duwi; dawak Sinaí kaupak kainadai, kidika karni balna minit yakat kilwi, witing ūni yakat.

¹⁸Papang, muih kidika laihta mayakau duilyawanamandai; dawak muih ahal paskaupak minit kidika lauwi mamanadai, dawak muih dudutni balna bitik man yakat bubuknadai,[39] Dawan.

¹⁹¡Dawan, mayang Mapapangki kidika laih ayangni nuhni yamna karang, mayang Mapapangki mailaihwi yakyang kidika, ma balna bitik yakat maturuknik kidika witing turukwi!

²⁰Mayang Mapapangki laih, Papang as laihwi yakyang bahang sipki mailaihwi yakna atnin daunin kaupak.

²¹Papang yaklauwi witing waihnila balna tunanina kidika papus sahna karang, ban dutni yayamwa balna tunanina kidika.

²²Dawan yulna: “Mayamting kat Basán kaupak nawatta yawama mayamting kat kuma tuhni kaupak nawatta yawama,

²³kaput laih man kalma suhna atnam, waihmala balna ānina kau dawak sumalu balna didina karang.”

²⁴Papang, yang Papangki, king, man pama holi yakat talna ki muih balna kidika kaluduhwi lapapakwak man ayangma nuhni kidika alasnina yayamwi.

²⁵Unbauyang balna kidika tatuna uiwi paswi yakisdinin dini duwa balna kidika laih dangnit yakat uiwi, dawak papus yakat laih sirarau balna kidika uiwi, kilinghnin dini kidika kilinghwinah uiwi.

²⁶¡Ayangni nuhni yamtanauh manna bitik Dawan yakat! ¡Israel kaluduhna kidika bitik ayangni nuhni yamtanauh!

²⁷Taninatuna yakat Benjamín kiwi, usnitnakauh kidika, Judá tunan muihni balna mahni karak, Zabulón dawak Neftalí kaupak.

²⁸Papangki, man parasma kidika nikingkatah; ¡watta yamtah, yangna yulkina yamnaman kidika!

²⁹Jerusalén kau, man ūma maluih kidika kaupak, kidika yakat king balna di uiwi mamawa kidika,

³⁰Egipto yakat biltah, juncos daniwan wayani yakat, kidika turuh anyang kaluduhna balna yakat witingna manah di balna kidika dunin yulni tawan balna yakat tataihwi; ¡kalatang kalruhwang, kidika muihni balna kalbaunin manah kukulwa kidika!

³¹Egipto kaupak muih[40] aiwarang: Etiopía kidika tingni dulauwarang Papang yakat.

³²¡Papang yakat unbautanauh, sau muihni balna, unbaunin balna unbautanauh Dawan yakat,

³³makau kisang yakat likkidika, makau kisang ban kaput atnin yakat! Dakanauh, witing dinit ampat yulwapa, witing dinit parasni nuhni duwa kidika.

³⁴Amanglatanauh, Papang parasni nuhni kidika: witing kingni lani kidika israel minit yakat ki; dawak witing parasni kidika laih makau kisang yakat kilwi kaki.

³⁵Di taldas tanit yamni as ki Papang laih witing pāni holi yakat; dawak Israel Papangni kidika yaklauwi parasni kalawi witing tawanni yakat. ¡Papang ayangni nuhni yamna karang!