Read Mayangna Salmos 69 Bible Online

Salmos 69 - Mayangna bible

Salmos 69

¹Coro sumalniyang kaupak, sulumtah puluni tiunni kau. Devid kaupak. Yalaihta yaktah, yang Papangki, kat was daunik manahyang bahang;

²wasmak as kat tuhni pasyakat yadukakiwi, kalki atakwatnik diski. Was tuhni palni yakat āwik yawanayang dawak was parasni murwa kidika yāduwi kiwi.

³Dikit bitik disdana sarahnamanah; dikitsuru dalawi; ¡mikpa balna bik kalsuhna yang Papangki yakat tāni tahanamanah!

⁴Mahniki, yangkau dutni yakukulwa kidika pīnikaupak tunaki kau baski balna karak dawakat; waihkila balna kidika baisa mahni kalahna, pīni kaupak yadaukalwa balna kidika, dawak yayuyulwi dīana atnik di as bik maltasyang yakauna.

⁵Yang Papangki, man yatalaman ampus tapaki dadasnidaipa; man kaupak sip maltasyang dutki balna kidika.

⁶Dawan, Papang man parasma bitik dutaman kidika, ¡asalnina kalahnin awaski yang yulki munah man yakat makukulwa balna kidika! Israel Papangni, ¡yang yulki witingna kulninna sanlanin awaski man yakat kulninna bitik mawawalwa balna kidika!

⁷Man yulma muih dutni yayulna ki, yang muhki kidika asalni kalahna;

⁸¡yang laih di taldas dini as kapatyang, dawak muih as bik yatalwas kapatyang, wirahki balna palni niningna yakat!

⁹Man ūma kidika yulni kasak minit antayang; yang yakat yabukna ki dutni yuyulwa kidika man yakat mauhuswa kidika.

¹⁰Yang di kastas datik aidingkat, sarahni yayuyulwi;

¹¹kulnik bukwak asna sani āwingkat muih bitik nikingkakari.

¹²Muih tininapas yakat likyang, dawak wasak diyang balna unbaunin yayamwi yang kau.

¹³Kaunah, yang laih Dawan, man yakat yultayang. Yang Papangki, ¡waralaih ilpyatah! Man dalani lani dutaman kidika kau, ¡nangkitlatah! Ma bitik yakat ilpma sihtaman kidika kau, ¡yalaihta yaktah!

¹⁴¡Datangkat wasmak yakat yataih-ahawarang! ¡Dutni yakukulwa balna kidika kaupak yalaihta yaktah dawak was tuhni kidika kaupak!

¹⁵¡Yadatangkat was parasni kidika yamurwi yadukiwarang! ¡Datang kat was tuhni purwa kidika yadukakiwarang!

¹⁶Dawan, nangkitlatah; ¡man laih muih yamniman dawak dalani lani bitik palni dutaman! Man minikun talnin lani nuhni palni dutaman kidika kau, yang akat yatalah;

¹⁷¡man dima yamyang adika rumhwi dawinih! ¡Nangkitlatah sirihni, yamadangni yakat sakyang!

¹⁸Yaihkit akat aiwa yalaihta yaktah; ¡waihkila balna kaupak yalaihta yaktah!

¹⁹Man amanglataman, ya-uhuswa kidika, asalni, dawak respik dis yayamwak wauhnayang kidika; man amanglataman, angdika waihkila balna kidika.

²⁰Yang kau ya-uhuswa kidika yulni kulnik bahna ki; ¡kulnik sau kau bukna dawak paraski bik diski! walnayang bik dauh manah ki wais yaklauwi walaki ānin dawak mikun yatalnin.

²¹Yang kasnik yakat puisin ahana, was dikih yawak wasni tapalhni yayawak dinayang.

²²¡Witingna tininabil, dawak kasninna balna kidika kulnin yamni atwi yayamna kidika witingna niningna yakat dilaihnin dini yakat wiryaklawang!

²³¡Yamtang kat miniknapa puklakwang dawak ban kaput karang kalnina yukwarang kidika!

²⁴Kulnam daukalna kidika witingna minitna yakat datang kiwang; ¡man kulnam daukalna dalhwa kidika dilaihwang!

²⁵Witingna ūnina labanni kidika kauhmak wanilang kalwang, dawak witingna ūnina labanni balna yakat muih as bik yalahwas karang;

²⁶dangnit yakat uiwi, kalatang kulnin bukna muihni yakat dawak sarahni kalyuyulwi kalatang kaldakna kat dalani wauhwa kidika yulni.

²⁷Dutni yayamwa kidika dutni kau wirlata diatah; ¡dutni datang diswa kidika, witingna laih duduwas karang!

²⁸¡Sangka atnin wauhnitaya kaupak tapmuktah! ¡Muih yayamni balna ayangnina ulna kidika yakarak libitwinih!

²⁹Kaunah yang laih, siknis kulnik bukna adika, yalaihta yadulautah, yang Papangki, yalaihta yaktah.

³⁰Unbaunin kau unbautik ayangni nuhni yamki Papang ayangni kidika; ayangni nuhni yamki tingkih lani karuk,

³¹dawak Dawan laih tanit isninglak kalna karang turuh almuk as sakripais buswi kalawarang kidika awaskat turuh wahma as tamni balna dawak kalni susni balna bitik kalawarang bik.

³²Kidika talwi, kulninna bukna balna kidika alasna duduwarang, dawak kulninna bukna balna kidika kulninna yaklauwarang Papang yakat walyang balna kidika;

³³kat Dawan laih muih miniknakunni balna yakat didakawa bahang dawak witing dini balna silak yakat bangkidika rumhwi dawas ki.

³⁴¡Dawan ayangni nuhni yamtanauh makau kisang yakat, sau dawak kuma, kaput bik kidika balna pasyakat di bangkidika bitik!

³⁵Kat Papang yaklauwi Sayan kidika laihwi yakwarang, dawak Judá tawanni nunuhni balna daukakalna kidika watwi dulauwi yamwarang. Witingna dinina yamyang walaninabis balna kidika duduna karang tawan nunuhni balna kidik; kidika yakat yalalahna karang dawak pānina duduna karang; ¡witing ayangni dalani tatalwa balna kidika yakat yalalahna karang!