Read Mayangna Salmos 7 Bible Online

Salmos 7 - Mayangna bible

Salmos 7

¹Devid Papang yakat unbauwi kulnin kaidana, Benjamín muihni Cus, yulni. Dawan, yang Papangki, man yakat nakitdaknik kidika waltayang; ¡yalaihta yakta muih mahni yauiwi aiwa balna kidika kaupak! ¡Yalaihta yakta, kidika balna laih layan kapatki; yākakaswarang, dawak muih as bik yalaihwi yaknin diskarang!

³Dawan, yang Papangki, ¿angdika dini palni kidika walnayang? ¿Yang muih īnayang katpah?

⁴¿Yang wanaihki yamni yayamna kidika dutni kau minitlautik kalanayang katpah? ¿Yang waihkila yakat taihnik awasdai bik taihnayang katpah?

⁵Kaput kat, waihkila kidika yauiwi kaiwang; yauiwi kaiwi yalaihwi sau yakat yālakwi yamurwang, dawak riskipik kidika sau yakat bukwang.

⁶¡Dawan, lawah, kulnam daukalna kidika karuk! ¡Waihkila balna kulninna daukalna niningyakat lawah! Man lawa la kat yamnin la ānaman kidika, ¡yang ilpki yamtah!

⁷Nisan balna kidika yakat awaihta dakta, dawak man yalahtaman kidika witingna minitna maluihni yakat atah.

⁸Dawan, man lawa nisan balna lanina yamtaman: bahang dutni yamtasyang kidika karak yang lāki yamtah.

⁹Papang barangniman kidika, man laihta talaman kidika muih kulnin dawak witing muihni kaldakawi tuhni balna bik, ¡muih dutni yayamwa balna kidika laihwattah, kauna muih al kulnin yamni kidika laih dulautah!

¹⁰Nakitdakyang kidika laih Papang makau palni sakkidika ki, witing laihwi yakwi angdika isningna yamni duduwa balna yakat.

¹¹Papang laih wihta as barangni ki, ma bitik yakat dutni kidika nining yakat dutni kulna.

¹²Muih al kidika Papang yakat nawatwi kiwas karangkat, Papang isniparah buhwi baiwarang; dawak witing lasni kidika uman isna duwasakki,

¹³sinibang sutni yakat dahlna kidika man yuna sakki, ¡kalbaunin dini dudutni palni duwa kidika bitik ridi yamna!

¹⁴Muih dutni yakat talnauh; muih yal muihbin duwi dalani wauhwa kidika kapat duwi, dutni manah kalbungki bahang yakwarang kidika laih alas manah karangki.

¹⁵Pa kudungni tuhni kuhrna ki, bahang kidika yakat witing silp bukwarang ki.

¹⁶¡Di dutni dawak kalbaunin lani kidika witing silp tunan yakat bukna karang ki!

¹⁷Dawan yakat ayangni nuhni yamki ki kat witing laih barangni bahang; Dawan ayangni kau duting unbaunin balna kidika unbauki, makau palni sakkidika ayangni.