Read Mayangna Salmos 71 Bible Online

Salmos 71 - Mayangna bible

Salmos 71

¹Dawan, man yakat nakitdaknin waltayang; ¡wat as bik datangkat asalki kalahnin-awaski!

²¡Yalaihta yaktah, kat man laih la kat man bahang! Yadakah, dawak yalaihta yaktah.

³Man laih yang maldinik kinipala awah, ¡dawak man laih yakmaldinin pāni[41] awah dawak yalaihwi yakyang! ¡Man kuduh kikipalaman dawak ūki parasni!

⁴Yang Papangki, muih dudutni balna tingnina kaupak yalaihta yaktah, dawak muih īyang dudutni balna tingnina kaupak bik,

⁵kat man laih, Dawan, wahmayang kaupak man yakatki tahanik atik dunayang kidika.

⁶Yang baisa nanangki bani pasyakat yang kat man yakat ilp yaktayangdai. ¡Man yayamtang batanh danayang! ¡Man ayangma nuhni yamki kidika ban kaput karang!

⁷Muih manas yang adika satuk yatatalna, kaunah man laih yang maldinikman.

⁸Ma balna bitik yakat yang tikipas laih bungki, man alasmana yaksihni yakat ayangni nuhni yamtayang kidika;

⁹muihbarak kaltingkat yarumhwi dawinih; yarumhwi dawinih yang paraski dis dawakat.

¹⁰Yang waihkila balna, yang akat yaīnin kukulwa balna kidika witingna aslah kalahwi, nikingkauh warknina dutni redi kakalwi.

¹¹Yuyulwi: “¡Uita laihtanauh, kat Papang yaklauwi dapamna bahang muih as bik sip laihwiyakwas ki!”

¹²Yang kaupak naikau kalahwinih, yang Papangki; ¡sirihni aiwa ilpki awah!

¹³¡Witingna asalnina kalahwang dawak dismukwang yang sangkika waihnila balna kidika! ¡Witingna asalnina kalahna karang dutniyangkat yatalnin kukulwa balna kidika!

¹⁴Kaunah yang minit bitik yakat tahaki, dawak baisa, baisa ayangma nuhni yamki,

¹⁵mapiris kaupak masan kat tūki kau yulna awaki, man lawa yanalaihta yaknaman dawak la kat bik yamnaman. ¡Adika laih di as yang sip amanglatas yang!

¹⁶Yang yulna awaki, Dawan, man di nuhni yamnaman kidika; ¡dawak bik yang yulna awaki man laih lakat man!

¹⁷Yang Papangki, wahmayang kaupak nikingkanaman, dawak warmani kat ban yultayang man di nunuhni yamnaman balna kidika.

¹⁸Yang Papangki, yarumhwi dawinih yang muihbarak kaltik baski pihni manah kalna karang bik, kat yang baisa yulnik bahang man parasma nuhni tannika kidika adika muihni balna yakat dawak tanit yakat kaiwarang balna kidika bik.

¹⁹Man lāma barangni kidika Papang, makau kisang kat kilwi ka ki man di nunuhni manas yamnaman; ¡muih uk diski man kapat!

²⁰Man yayamtang talnayang karang bik di dudutni manas dawak kulnik buknin balna bik, watta yatang sangka awaki; sau paskau tuhni kidika kaupak watta yadulauma,

²¹yang akat baisa nuhni yayamma dawak watta walaki āma.

²²Yang nikingkauh laih, unbaunin balna kidika unbauki, dawak ayangma nuhni kidika nuhni yamki, paswi yakisdinin dini balna kau pastik, yang Papangki, Israel Papangni holi.

²³Yang tikpas kidika alasna duwarang man ayangma nuhni yamwi, kaput bik laih yang muihki balna bitik, man lawa laihta yaknaman kidika.

²⁴Yang tuki balna bik awar bitik yakat yulna karang man laih la katman, kat yang dutniyang kat talkih diawa balnadai kidika asalnina nuhni kalahna bahang.