Read Mayangna Salmos 74 Bible Online

Salmos 74 - Mayangna bible

Salmos 74

¹Asaf yulni damni. Papang, ¿aisyamta yanarumhta danaman kidika ban kaputkarangyah? ¿Aisyamta man sīpma balna yakat kulnam daukalnamanh?

²Ismangkattah, man tawanma yakat, tatuna kaupak yakta dunamandai kidika, laihta yaknamandai man dima atnin; ismangkattah Sayan asangni yakat yalahnamandai kidika.

³Bahwi uhna sarandis adika aiwa talah; ¡waihla kidika yaklauwi pa holi adika daukalpamna!

⁴Man waihmala balna kidika minit bayaknamayang atwi unbabauwi man pāma holi yakat; ¡sau ūk planikin kidika duwi uiwi ihilna

⁵dūr kiwi kawa minit yakat! Kuh sahyang balna kapat asangpas papus yakat,

⁶ki kau, amar kau bauwi babahna pan kau di yamna balnadai kidika.

⁷Pāma holi dai kidika kuhkau bubusna; ¡risnipik dis yayamna man ūma kidika, saukat tuklalakna!

⁸Bitik maidaukalpamnin yayamna; ¡sauni pas akat pa balna kidika bitik laih bubusna kidika pāni balna yakat kal-uduhtik ayangma nuhni yamtayangnadai kidika!

⁹Maisihnidis sainnidai kidika yangna talasyangna; prapit as bik diski, kaput bik amanglatasyangna adika dini ban kaput karangpa.

¹⁰Papang, ¿mampat kat mawaihkila mai-uswa kidika dadawarangyah? ¿Man yakat dutni mayulwa kidika mampatkat dawarangyah?

¹¹¿Ais yamta maltamanh, tingma parasni nuhni kidika? ¿Ais yamta kalwakaihna sakmanh?

¹²Sarā mani kaupak, man laih yang kingkiman. Man, Papang, manas man minit bayaktaman sau minityakat:

¹³man parasmakau kuma kidika sahtayaknamandai, kuma paskau di anyang dudutni balna kidika tunanina yakat sahnamandai,

¹⁴Waula tunan kidika atakta labannaman dawak muihni kidika laih kauhmak wanilang kau nawah balna yakat dianamandai.

¹⁵Man lawa kalatangkat was balna kidika burhwi kalahna, dawak was buhlakwas balna kidika kalatang kat buhlakna.

¹⁶Pukta dawak madah kidika laih man dima, dawak man lawa āta danaman waiku dawak ma kidika bik;

¹⁷man lawa sau kiwi watwa kung balna kidika ānaman; man lawa wasma dawak kurih kidika yamnaman.

¹⁸Man kulnam yakat dutah Dawan, waihmala balna mauhuswa kidika, dawak bik muih tapadadas balna kidika man yakat dutni mayuyulwi.

¹⁹¡Yangna adika damatkahwinih uba! Yangna laih sip-awasyangna sihm buhtuku kapat; ¡nawah balna pasyakat yāna-āwinih!

²⁰¡Damatkahwinih man pramamis kidika, kat adika sauni laih kalbauninmanah banghna bahang sutni kat!

²¹Taihna muihni kidika datang sau yakat buknin-awas ki; ¡diatangkat ayangma nuhni yayamwang muih minikunni dawak limahni kidika bik!

²²¡Papang lawah! ¡Nanitdaktah man yulma kidika! ¡Ismangkattah, tapdadas balna kidika ma-uhuswi laihwatwas palni!

²³Waihmala balna sararahwa kidika datang damatkahnin-awas ki, muih dudutni balna parasni sarahwi baisa yuyulwa kidika.