Read Mayangna Salmos 77 Bible Online

Salmos 77 - Mayangna bible

Salmos 77

¹Coro sumalniyang kaupak. Jedutún kaupak. Asaf salnimo. Yang dikit parasni yultik Papang yakat kalyultayang witing yadakanin yulni.

²Kulnik bukna māni kidika yakat Dawan waltayang, dawak yang tingki dulautayang kidika laih laihwattas ban dulautayang mikityultik, pukta yakat. Yang solki kidika walani ānin sip yakwas ki.

³Papang yakat isingkattik aidayang; yul balna kidika kulting sip kulnik yaklauwas ki.

⁴Man, Dawan, yadatangkat mikpa sipiktasyang; ¡pini sinski disdana, yulbaunik bik sip-awas ki!

⁵Yang sara mani balna dawak kurihni balnadai yakat kultayang;

⁶isingkatwi pukta yakat unbautayangdai kidika. Yang kulnik pasyakat kultik talayang, dawak silp kalyultik dakayang:

⁷¿Dawan, man ban kaput kulnam daukalna sak-awamayah? ¿Watta mikun yatalas awamayah?

⁸¿Minikun talnin lani dutaman kidika danhkalnakatpah? ¿Man pramamis kidika danhkalnayah, ban kaput atnin?

⁹¿Papang, witing minikun talnin lani duwadai kidika danhkalnakatpah? ¿Witing uba kulnin daukalnayah, minikun talnin lani kidika diskalnayah?

¹⁰Yang kultingkat uba dalaniyawa kidika laih makau sakkidika alni dai kidika, muhnilaudai kapat awaski mayangyakat.

¹¹Di taldas dini balna yamna dai kidika isingkatki, ma bayakna balnadai yakat Dawan yamna dai kidika;

¹²di yamna balnadai kidika bitik yakat kulki.

¹³Papang, man laih holi man yamtaman balna bitik yakat; ¿angdika Papangni, man kapat nuhniyah?

¹⁴¡Man kuduh Papangman, di taldas dini yamtaman kidika! ¡Man parasma kidika niningna kanaman nesān balna yakat!

¹⁵Man parasma kau tawanma kidika laihta yaknaman, Jacob dawak José walanibis balna bik.

¹⁶Papang, kuma kidika manyakat matalwi yamaduna, dawak wasni tuhni balna kidika yukna;

¹⁷mukus balna kidika wasnina dadawak launa, dawak makau kisang yakat alwana parasni yulna, dawak lapwa kidika laih pa bitik yakatdai.

¹⁸Wing purwa kidika yakat almawana kidika dakanadai; sau bitik kidika ahni manah lāih talnadai lapwa kidika yulni dawak sau kidika bik yuknadai.

¹⁹Kuma pasmunah man tama yamnamandai; dawak was balna manas laih daktalawanamandai, man kalma ataknaman kidika muih as bik yakwasdai.

²⁰Man tawanma kidika tinglau dakni as kapat duta yawanamandai, Moisés dawak Aarón tingni munah.