Read Mayangna Salmos 78 Bible Online

Salmos 78 - Mayangna bible

Salmos 78

¹Asaf yulni damni. Yang tawanki, yang sumaltayang balna kidika dakah; ¡yang mayultayang balna kidika yamni tapayuta dakah!

²Waradika laih kulwi talna sinsni lani karak yulmabauki; di malnikau balnadai kidika yaktik yulna awaki sara mani balnadai kidika kaupak.

³Dakanamayang kidika dawak amanglana mayang kidika laih mapapangki balna maiyuyulna,

⁴mayang mawalakibis balna yakat dimaldas karang. Sulani balna matakit yakat kaiwarang kidika balna karak, Dawan yakat ayangni nuhni yamdarang witing parasni nuhni kidika dawak di taldas balna yamwa kidika yulni baudarang.

⁵Papang yaklauwi la as yamwi kalana dai Jacob yakat; Israel witing amput lapaknin kidika lani kalana dai, dawak yangna muihkinabararak balna yakat dipakna dai sulanina balna kalahwi kaiwarang yakat sumalna atnin,

⁶kaput laih sulanina balna kalahwi kaiwarang kidika amanglana atnin yulni, witingna walaninabis batanhdadawarang balna kidika, dawak kidika balna walaninabis tilah kaiwarang kidika balna yakat sumalna atnin;

⁷kaput laih Papang yakat kulninna āwi duna atnin dawak dinitna kahnin-awas witing di yamna balnadai kidika; kaput laih witing lani kat dakawi yamna atnin

⁸dawak witingna muihnina bararak balnadai kapat atnin-awas, kulninna dutni dawak tapdadas witingna piritnina dawak isningna kidika parasni-awas; ¡sulani balna barangni-awas Papang yakat!

⁹Efraín muihni balna kidika, witingna kalbaunin dini sibang dawak las duwabangdai kidika, kalbaunin mani kaiwak wiryaklawi dangsasana;

¹⁰Papang kau pramis yayamna dai kidika kat yayamwas dadana sumalna balnadai kidika bik dakawas dadana.

¹¹Dinitnakahna, witing di yamna balnadai kidika bik, dawak di taldas dini yamwi niningnakānadai kidik bik.

¹²Witingna papangnina balna yakat Papang yaklauwi di taldas dini kidika yamwi niningna kanadai Egipto sauni kau, Zoán pāni yakat;

¹³kuma kidika bu sahyaknadai, dawak kidika yakut diawak dakyaklalanadai, was kidika laihwatnadai, sihm daklana kapat.

¹⁴Madah yakat laih mukus kau diawak taninatuna kiunadai; dawak pukta yakat laih kuhpau kau diawak taninatuna kiunadai.

¹⁵Kauhmak wanilang yakat kipala kidika bu sahyaknadai, dawak was mahni palni laih diawak didinadai.

¹⁶¡Papang yaklauwi kalawak kipala kaupak was burhwi kalahna dawak was parasni murnadai!

¹⁷Kaunah witingna ban Papang niningyakat dutni yayamna dai; dawak kauhmak wanilang yakat Papang niningkauh yaklalaunadai.

¹⁸Witingna trainitatalnadai, di kasnin balna kidika manas dunin kukulna.

¹⁹Witing nining yakat yulwi yuyulna: “¿Papang kidika sipkat patyang kauhmak wanilang pasyakat tibil kau dilakna atnin?

²⁰Rahmki witing kipala kidika papustirhna; dawak kidika kaupak was burhwi kalahwi was parasni murna, dawak sau yakat bang-ilna; kaunah, ¿sipyah di kasnin bik yūna atnin? ¿Witing tawanni yakat dimuihni bik kalanin sipyah?”

²¹Dawan adika yulni dakawi, kulnin daukalna; ¡kulnin daukalna kidika kuhpau as kapat dalhna Jacob niningyakat!

²²Papang yakat rahm kukulwas dadana bahang ilp diawa kidika bik kukulwasdai.

²³Kaput kaunah Papang yaklauwi mukus balna yakat paknadai dawak makau kisang dūrni bik apahna dai;

²⁴¡witing tawanni minit yakat kalawak mana kidika was kapat launadai, makau kisang planiwar, witingna kasna atnin yulni!

²⁵¡Muih ahal balna kidika insal balna planinawar busna kakasna! ¡Papang yaklauwi mahni diawak kakasna!

²⁶Ma kilwa kaupak wingni dawak wadah kaupak wingni kidika makau kisang yakat wauhna dai; ¡Papang parasnikau duaina dai!

²⁷Yamwakat dimuihni kidika waslauwa kapatdai witing tawanni minit yakat; ¡waslauwa kapatdai di lawāni balna kidika, sihm kuma kauhnimak kapat!

²⁸Papang yaklauwi yamwak ū lababanni pasyakat buknadai, witingna bangkidika yaihnit yakat.

²⁹Witingna minitna bayak kakasnadai, kaput Papang yaklauwi dukih diawa yakat dianadai.

³⁰Kaunah witingna di kaskih diawa kidika diswas bandai, kaput bahang witingna tininapas yakat di kakaswa kidika bunghdai,

³¹kaput bahang Papang kulnin daukalna kidika witingna minitnayakat buknadai dawak muih ahal tanit pararasni kidika īna. ¡Yamwak dadauna israel ahalni yayamni balna kidika!

³²kaput kalahna dai karang bik, witingna watwi dutni yayamna; dawak Papang, di tatalwas balna yamwa kidika yakat kukulwasdai.

³³Kaput bahang Papang yaklauwi sangnika kidika dakna yak-urupda as kapat yamadangni bilnilauwa pasmunah.

³⁴Papang yaklauwi di yamwak dadauwadai, kaput dawak laih kalwawalwadai; witing yakat nawatwi aiwi kalwawalwadai yak-urupdas;

³⁵Kaput dawak laih witingna isningna katwadai bahang dilaihwi yakwi nanitna dakwadai.

³⁶Kaunah witing tinpas dawak tūni kau kalyulwadai alas nunuhni dawak yayamni as,

³⁷Kaunah witingna alas yuyulwas awasdai witingna praninamis yakat bik barangni-awasdai.

³⁸Kaunah Papang laih minikun talnin kidika duwadai, dutnina kidika dawak diswadai, kaput laih īwasdai; watmanas witing kulnin daukalna kidika yaihnit yakat lawadai dawakat kulnin daukalna kidika yakat kalmurwasdai.

³⁹Papang yaklauwi isningnapakna, witingna kidika laih muih dauhki; witingna kidika laih wing bayakwi kiwa kapatki, dawak bik watwi nawatwi kaiwas kidika.

⁴⁰¡Watyapak Papang yulni dakawas dadanayah dawak Papang yakat dalani kalalanadaih kauhmak wanilang yakat!

⁴¹Kaunah watwi trainitatalnadai; ¡Israel Papangni kidika kulnin bukwadai!

⁴²Kidika mani balnadai kidik isningna katwasdai Papang witing parasni kau dilaihwi yaknadai kidika waihninala tingni kaupak;

⁴³Egipto kau, Zoán pāni yakat, di nuhni bik yamna dawak taldas dini bik;

⁴⁴was kidik ā yamna dai kidika, Egipto muihni balna sip didiwasdai kidika.

⁴⁵Witingna minitna yakat kalating sihna dawak pikpik balna bik kidika balna yaklauwi di bitik kakasna dawak bik daukakalna;

⁴⁶di minik balna kidika sisin balna yakat dianadai witingna wark yayamna balnadai kidika.

⁴⁷Di minik balna dawak buiwi awakidika yaklauwi aninina damni yanimak dawak wainnina yanimak balna bik daukalna.

⁴⁸Tuninaruh balna dawak sīpnina balna bik dadauna, di minik balna uhwa kidika dawak alwana bik yaklauwi īna.

⁴⁹Papang yaklauwi sihna witing kulnin daukalna parasni kidika: kulnin daukalna, dutni yakat sihnin, dawak kulnin kaidinin bik, di dis kalahwa kidika isningpakna atnin.

⁵⁰¡Witing kulnin daukalna kidika uluhna! Sangninaka ban diawasdana, nawatkauh laih daunin yakat dituk-āna;

⁵¹¡diyamwak dadauna Egipto yakat Egipto muihni balna walaninabis tatuna kidika kalawak bitik dadauna!

⁵²Israel kidika di tinglau kapat yakwi duwi kiuna; witing tawanni kidika duwi kiuna kauhmak wanilang munah.

⁵³Ta yamni yakat duwi kiuna witingna yamaduduwas atnin yulni, kaunah witingna waihninala balna laih kuma yaklauwi āmuknadai.

⁵⁴Papang yaklauwi witing tawanni kidika witing sauni holi yakat duainadai, ¡asangpas as witing yaklauwi dakyakwi duna dai kidika yakat!

⁵⁵Israel balna miniknapa kaupak yakmuknadai Papang karak kaltatalwas balna kidika; dawak sau kidika dakwi dianadai sulani balna bitik kau, dawak witing yaklauwi diawak ūnina labanni yakat yalalahnadai.

⁵⁶Kaunah witingna yaklauwi Papang makau sakkidika yakat traini tatalnadai witing niningkauh yaklauwi witing lani balna kat yamwas dawi;

⁵⁷dawak witingna laih sihm papangni balnadai kapat ki; rumhwi dadana dawak bik barangni-awasdai; ¡kawaini sihm las kapat kakalnadai!

⁵⁸Papang kau kaltatalwas muihni balna sakripais bubuswa pāni kidika yaklauwi kalyayamwak kulnin daukalnadai; dawan dauh yakat minitna yuyulwa kidika yulni, minitna annadai.

⁵⁹Papang, kidika talwi kulnin daukalna, dawak israel kidika bitik laih rumhwidana,

⁶⁰dawak Silo kau pāni holi dai kidika rumhwidana, muih ahal pasyakat witing ūni duwadai kidika.

⁶¹Dawakat waihnila balna kidika lalaihnadai witingna alasnina yaksihni dawak parasnina sainnidai kidikabik.

⁶²Witing tawanni niningyakat kasak kulnin daukalnadai bahang waihla balna isninaparah yakat dianadai.

⁶³Wawahninama balna kidika dibuswak dadaunadai; ¡sirau al duwada kidika yakat unbaunin disdai!

⁶⁴Sumalyang balna kidika isparah kau dadaunadai, dawak tingninamak balna kidika bik kakaidasdai.

⁶⁵Kaunah, Dawan sahmuhnadai, kamatuskauna yaklauwa kapat, kalbauyang muihni wain wanisak kaupak kalbauwilawa kapat,

⁶⁶dawak waihnila balna yakat minitna bayakwi diyamwak kikirana dai; ¡asalnina manah ditaihnadai ban kaput atnin!

⁶⁷José ūni yakat bik rumhwi danadai, dawak Efraín sulani balna bik duwas danadai;

⁶⁸kaput kauna Judá sulani balna kidika duna dai dawak witing asangni dalani talwa Sayan kidika bik.

⁶⁹Holi pāni as yamna dai maluihni sihm makau kisang kapat, dawak pāni yamni kalana dai sihm sau āwi danakapat.

⁷⁰Witing dini yamyang Devid kidika yakwi duna, sīp maintalyang muihnidai kidika;

⁷¹tinglau balna dangnitna yakat lik-awadai kidika kaupak yaknadai, witing tawanni kidika maintalna atnin yulni.

⁷²Dawak kaput laih Devid kidika Papang tawanni maintalnadai; maintalwi tatuna kawi duwi kiunadai, witing tingni sirihni dawak kulnin yamni alas yulwas lani karak.