Read Mayangna Salmos 88 Bible Online

Salmos 88 - Mayangna bible

Salmos 88

¹Coré walanibis balna unbabauna dawak Salninamo. Coro sumalniyang kaupak, siknis kidika yulni. Hemán ezrahíta kaupak kidika yaklauwi sumalna unbauna atnin yulni. Dawan, yang Papangki, yalaihwi yakyang, pukta madah, manyakat ilp mayultayang,

²¡mikityultayang kidika dakah!, ¡yultayang kidika dakah!

³Dutni mahni yang mikit yakat bukna kidika, dauknik manah dana;

⁴¡uman dauna balna pasyakat yakulnin ki, kat paraski dis dana bahang!

⁵Yarumhwidana ki dadauna balna pasyakat; kalbauwi dadauna balna kapatyang dawak bik uman nununa kidika; nanitna daktaman kidika dispapamna kapat dawak bik man lawa dinitna kahnaman kapat.

⁶Pa sulihni kau tuhniyakat yahanaman, pa puksani dawak tuhni yakat.

⁷Man kulnam daukalna kidika mikit yakat datang bukna, ¡wasma lalamwa tikini kidika yaklauwi yataihwi āna!

⁸Yamnaman, kaltalyang balna yamniyang kidika yarumhwi dana atnin; yamnaman, yang adika witingna niningna yakat dutni atnik. ¡Yang laih silak muihni as sip kiri yaklawas kapatyang!

⁹Kaidana manah, mikpa adika puklakwi. ¡Ma bitik yakat Dawan man yakat mayultayang, dawak man yakat tingki dulautayang!

¹⁰¿Dadauna muihni balna yakat di taldas dini kidika yammakatpah? ¿Dauna muihni balna kidika tingkih mayuyulwarang-katpah?

¹¹¿Rahm man kidika, dawak dalani lani dutaman kidika yulni yulwarangkatpah, sau ū, dauna balna pānina yakat?

¹²Daunin pāni puksani yakat laih di bitik dinitkahwi, ¿muih as sakkarangh amanglana atnin, man barangniman kidika, dawak di taldas dini yamtaman kidika?

¹³Kaunah yang laih Dawan, man yakat yultayang; mapiris yakat man yakat mikityultayang.

¹⁴¿Ais yamta di dauh kapat yatalamanh Dawan? ¿Ais yamta yangkaupak maldamanh?

¹⁵Wahmayang mani balna kaupak kulnik bukna daunin kat; man kaupak, di yamadadangni balna kidika wauhnayang, kaunah waralaih baisa sip-awasyang.

¹⁶Man kulnam daukalna yamadangni kidika mikitmunah bayakna, dawak mikit bayakna;

¹⁷awar bitik yakat ya-awaihdakki, sihm was ilna kapat.

¹⁸Kaltalyang yamni balna dutayangdai kidika kaupak naikau yayaknaman, dawak waradika laih puksani manah kaltalyang dutayang.