Read Mayangna Salmos 89 Bible Online

Salmos 89 - Mayangna bible

Salmos 89

¹Ezrahíta muihni Etán sumalwa kidika. Dawan, yang unbautayang yakat yultayang kidika ban karang man laih minikun talnin lani kidika dutaman; minit bayakwa balna kidika bitik yakat dawak man laih barangniman.

²Yang yulna awaki man dalani lani dutaman kidika laih ban kaput ki bayakkiwas; man minikun talnin lani dutaman kidika sip satuk kalwas ki, sip satuk kalwas ki sihm makau kisang kapat.

³Devid karak pramis as yamnaman; man dima yamyang yakat pramis yamnamandai:

⁴“Yamtingkat sulama balna kidika man pāma yakat king kakawa karang ban kaput atnin.”

⁵Dawan, makau kisang muihni balna bitik ayangma nuhni yayamwi barangniman kidika dawak di taldas yamtaman balna kidika.

⁶¡Dawan as bik, makau kisang yakat bik diski man karak malibitna atnin, Papang!

⁷Papang nuhni yamadangniman dawak, ¡makau kisang muihni balna manah ma-awaihdak duduwi!

⁸Dawan, Papang parasma bitik dutaman kidika, parasni kidika bitik laih man dīma, dawak di rahm kidika ma-awaihdakki; ¡as bik diski man kapat!

⁹Kuma anwa kidika man taihlakta dutaman dawak nunuhni lalamwa balna kidika kalatang kus dawi;

¹⁰kuma paskau di anyang dutni kidika bik taihta labannaman, sihm muih dauna as kapat; waihmala balna kidika kalatang uhna, man tingma parasni kidika kau.

¹¹Makau kisang dawak sau kidika man dima, sau kidika man yamnaman, dawak paskau di balna bangkidika bitik.

¹²Man lawa yamnaman, wadah niningkauh dawak tingpal niningkauh kidika bik; Tabor asangni dawak Hermón asangni kidika bik, alasna unbabauwi man ayangma kau.

¹³Man tingma kidika laih parasni nuhni duwi; tingma palni kidika laih parasni ki dawak bik minit bayakyang ki.

¹⁴Man yalahdaman pāni kidika laih lā kat dawak rahmni kidikaminit yakat sakki; dawak dalani lani di rahm kidika karak namang yakat kalahwi uiwi makalpapakwi.

¹⁵Dawan, angdika tawanni man yakat alasna ayangma nuhni yamwi lan kidika laih alasna ki dawak man awasma kidika kau yaringni duwi lapakwi,

¹⁶dawak man ayangma kau alasna duwi ma bitik yakat dawak kulninna yaklauwi man barangniman kidika yulni.

¹⁷Rahm kidika laih, man kidika kuduh witing parasniman dawaknuhni yamni kidika bik; yangna paraskina kidika baisa nuhni kalwi, man kulnam yamni dutaman kidika yulni.

¹⁸¡Mayang manakitdakyang kidika laih Dawan! ¡Mayang makingki kidika laih, Israel kaupak holi kidika ki!

¹⁹Ma bayakna balna yakat amanakau kapat yulbaunaman, man dimayamyang barangni balna yakat diyulnaman: “Yang tawanki paskaupak kulnin parasni duyang as walyaktik dunayang, mayakat kaldulaunayang dawak ilp kalanayang.

²⁰¡Yang diki yamyang Devid kidika kalpaknayang! Yang dīaki kidika kau kalutuhtik king ānayang,

²¹dawak yang ilpki kidika dis-awas karang. Yang paraski kidika parasni kalyamnayang karang,

²²dawak waihnila balna kidika yaklauwi witing niningyakat kalbabauwas karang dawak muih dudutni balna kidika yaklauwi minit bayakwas karang.

²³Witing waihnila balna kidika yang lawik taihtik labanki; ¡dawak witing muhni kaupak bik yakmukki! ¡Dawak witing yakat dutni kalkukulwa balna kidika dakmukki!

²⁴Yang dalani lani dutayang dawak barangniyang kidika karak bik kulna karang, dawak yang munah, witing parasni kidika baisa duna karang.

²⁵Witing parasni kidika kalaki, Mediterráneo kaupak Éufrates kat.[52]

²⁶Witing yaklauwi yayulna karang: ‘Man laih yang Papangkiman; yalaihta yakta dawak bik nakitdaktaman.’

²⁷Dawak yang lawik walanibis tatuna barakni rahmni kidika maki, sau kingni balna minitna yakat.

²⁸Witing niningyakat dalani talayang kidika laih ban karang, dawak witing niningyakat prakimis bik ban yakat karang.

²⁹Dawak witing pāni yakat sulani balna kidika king kakawarang kidika laih ban kaput karang, makau kisang kidika ban karang mani balna yakat.

³⁰“Kaunah yang sumaltayang balna kidika rumhwi dadawarang kat dawak bik yang laki balna yakat bik yalalahwas karang kat,

³¹dawak bik lāki yakat-awas karang kat, dawak laki balna bik dakawi yayamwas karang kat,

³²witingna dutni yayamwa kidika yulni wah diaki, pan kau diwiski;

³³kaunah Devid yakat dalani talayang kidika laih datas awaki, dawak barangniyang kidika witing niningyakat ban karang.

³⁴Yang prakimis kidika bahtas awaki dawak yang yulki balna yakat bik yamki.

³⁵Wat as yang ayangki holi kidika karak libittik pramis yamnayangdai, kidika bahang alas kalyultas awaki:

³⁶sulani balna kidika witing pāni yakat king kakawarang, ma kidika bayakkiwas ban karang mani balna yakat.

³⁷¡Ban pamni sak-atnin, sihm waiku kapat! ¡Ban pamni sak-atnin, makau kisang kidika ban bayakkiwas karang mani balna yakat!”

³⁸Kaput kaunah, dauh kalkulnaman dawak rumhta danaman king as man yakta dūnamandai kidika; ¡witing karak kulnam daukalnaman!

³⁹Man dimayamyang karak pramis yamnamandai kidika daukalpamnaman; dawak witing paknin kidika sau yakat rumhtalaknaman.

⁴⁰Daklana balna bitik yakat kurhta alhnaman, sulihni; ¡dawak witing tawanni nunuhni balna kidika daukalmuknaman!

⁴¹Muih bitik kidika yakamunah bayakwi, ais malkih diawa kidika mamalwi; dawak witing yaihnitkau balna kidika yaklauwi sarahni kalyuyulwi.

⁴²Yamtang kat witing waihnila balna kidika tingnina alasna dulalauwi minit bayayakna kidika.

⁴³Isninaparah baini kidika bik disyamnaman dawak kaput bik kalbaunin yakat ilp diatasmandai.

⁴⁴Witingna yamnidai kidika dakyaknaman dawak witingna trunnina kidika sau yakat rumhlaknaman;

⁴⁵dawak witingna sangninaka kurihni balna kidika dakyaknaman dawak asalni manah dibahngnaman.

⁴⁶Dawan, ¿mampatkat maldanaman kidika kaupak alahwamayah? ¿Man kulnam daukalna kidika kuhpau kapat ban dalhwarangyah?

⁴⁷Dawan, ismang-aitah yang sangkika laih parahni ki; man lawa muih al yamnaman kidika, ma parahni sangka ki.

⁴⁸¡Muih as bik sip sangka awaski, dauwas ban atnin! ¡Dawak daunin parasni kaupak muih as bik sip yaklawas ki!

⁴⁹Dawan, ¿man tatunakau dalani talamandai kidika angkat sakyah, barangniman kidika kau Devid yakat pramis yamnamandai kidika?

⁵⁰Dawan, ismangkattah, man dima yamyang balna yakat muih manas yaklauwi uhuswi; yauhuswa balna yulni kidika yang kulnik yakat duyawayang.

⁵¹Dawan, ¡kaput man waihmala balna kidika yanauhuswi! ¡Kaput bik, man walta yaknaman muihni yakat uhuswi!

⁵²Dawan yakat yamni kalyamna karang, dawak kidika laih ban kaput karang. ¡Kaput karang!