Read Mayangna Salmos 91 Bible Online

Salmos 91 - Mayangna bible

Salmos 91

¹Nanitdaknin dinitkau sanni yakat yalahwa kidika Papang makau sakkidika dawak bik parasni nuhni duwa kidika,

²Dawan yakat kalyulwi: “Man yakat kuduh yang maldinik pāni kidika, yang ūki parasni, ¡yang Papangki, man yakat kulnik ātik dutayang kidika!”

³Witing manah sipki malaihwi yaknin malaihnin dini malnikau āna kidika, dawak siknis dutni kidika kaupak bik,

⁴kat witing lawāni kau mamukna karang bahang dawak kidika dinit yakat dutni as bik dis sak-āwama. ¡Witing barangni kidika kau namatdakna karang!

⁵Pukta paskau yamadangni balna kidika niningyakat yamaduwinih, dawak madah yakat sibang rumhwa kidika yakat bik,

⁶dawak pukta yakat siknis balna kalahwa kidika yakat bik, kaput bik madah palni yakat īwa kidika bik;

⁷kat wadahma niningyakat tausin dauwi bubukwarang, dawak tingmapal nining yakat tausin salap dauwi bubukwarang, kauna man yakat laih di as bik malaihwas karang.

⁸Man laih dauh manah talasak āwama: muih dudutni balna minitna duduwak talma.

⁹Kat man laih Dawan yakat yakmaldinin pāni yamnaman bahang, dawak makausakkidika yakat namatdaknin pāni dunaman bahang,

¹⁰man mamatyakat dutni as bik kaiwas karang siknis bik ūma yakat kiwas karang;

¹¹kat witing innisal balna sihwak mainmatatalwarang angkat yawama yakat.

¹²Witingna tingninakau malaihwi madulalauwarang kipala yakat kalma baunam-awas yulni.

¹³Sip-āwama layanh pasyakat lik-atnam di anyang dudutni balna dawak bik bil pasyakat bik lik-atnam.

¹⁴“Yang lawik laihtik yakki, muih sip lalaihwas pāni yakat ilki, kat witing laih dalani yatalwi dawak amangkilawa bahang.

¹⁵Mampat yayulwarangkat, yang lawik nangnitlaki; ¡yang witing karak āwaki! Kulnin kaida kidika kaupak laihtik yakki dawak risnipik nuhni kalaki;

¹⁶dawak sangnika naini kalaki: ¡dawak yang laihtik yaktayang kidika kalating alasna duwarang!”