Read Mayangna Salmos 94 Bible Online

Salmos 94 - Mayangna bible

Salmos 94

¹¡Laih alahwah, Dawan, biriwi kalyamnin Papangniman kidika!

²Man laih sau bitik wihnitaman; ¡nuhni kaldakakawa balna niningna yakat lawah dawak minitna diatah!

³¿Mampatkat Dawan, mampatkat muih dudutni balna alasna duduwa kidika dadawarangyah?

⁴Muih dudutni balna bitik kidika witingna laih tapaninadadasni dawak witingna manah kapat kaldakakawi; ¡witingna balna laih witingna manah kapat kaldakawi yulyang muihni balna!

⁵Dawan, witingna yaklauwi man tawanma kidika ihiwi; ¡dawak man dima kidika sau yakat lalakwi!

⁶Tingmak balna dawak pa ūk muihni balna kidika laihwi ihiwi; warau balna kidika laihwi ihiwi.

⁷Witingna yuyulwi, Dawan laih talwas ki, Jacob Papangni laih amanglawaski.

⁸¡Amanglatanauh, di sip-awas balna dawak tapdadas balna! ¿Mampat amanglanin sip awanamayah?

⁹¿Dakanin sip-awas katpah, dakanin yulni tapani yamwi kalana kidika? ¿Talwas karangkatpah minikpa yamwi kalna kidika?

¹⁰¿Wah kalawas karangkatpah nesān balna yakat barangni yakyang kidika yaklauwi? ¿Amanglawas karangkatpah muih al yakat di amanglanin niningkayang kidika muihni?

¹¹Dawan amanglawi muih al kidika di dauh balna yakat manah kulwa kidika.

¹²Dawan, isninglakki angdika muihni yakat barangni kalyaktaman kidika dawak bik sumaltaman kidika

¹³isninglak atnin yulni ma dutni balna kiwi kawarang mani yakat, dawak muih dutni kidika laih pāni kurhwi redi yamwi.

¹⁴Dawan laih witing tawanni kidika rumhwi dawas karang ki dawak witing dini balna kidika witingna manah didawas karang.

¹⁵La kat yamnin kidika laih ban barangni karang, dawak muih ahal kulninna yamni balna kidika ban usnit uiwi uiwarang.

¹⁶¿Wais yaklauwi nakitdakwarangyah muih dudutni balna kidika kaupak?

¹⁷Dawan kidika ilp yawasdai katlaih, yang laih uman dauwi ap danin pāni yakat atnikdai.

¹⁸Yang ma as kat yulnayang: “Kalki balna kidika atakting karhwi”, dawak, Dawan dalani lani dutaman kidika kaiwi ilp yāna.

¹⁹Kulwi kalbaunin pasyakat yang kulnik yakat biri kalbabauwa kidika, man lawa walaki ātaman dawak alasna yataman.

²⁰Man laih sip wihta dudutni balna karak kalpaktasman, la niningyakat dutni yayamwa balna kidika;

²¹muih al dutni yamwas dawak kulnin yamni muihni niningyakat aslah kalpakwi īnin yayakwi.

²²Kaunah Dawan kidika yakat yang maldinik pāni dutayang; Papang kidika laih kipala as yang nakitdakwa kidika ki.

²³Dawan yaklauwi yamwarang muih dudutni balna niningna yakat witingna alas dutnina kidika yaklauwi dihiwarang. ¡Mayang Mapapangki yaklauwi dismukna karang!