Read Mayangna Salmos 96 Bible Online

Salmos 96 - Mayangna bible

Salmos 96

¹Unbaunin wisam as unbautanauh Dawan yakat; unbautanauh Dawan yakat, sau muihni balna;

²unbautanauh Dawan yakat, ayangni nuhni yamtanauh; ma kaiwa balna yakat, witing laihwi yakwa balna kidika yultanauh.

³Witing alasnina yaksihni balna kidika yultanauh dawak di taldas dini balna yamwa kidika bik tawan balna dawak nesān balna bitik muhnina yakat,

⁴kat Dawan laih nuhni bahang dawak ayangni nuhni yamnin kidika laih witing dini palni ki: ¡tanit yamadangniki, dawan dauh balna bitik karak dawakat!

⁵Tawan uk balna Papangnina kidika laih dauhki, kaunah Dawan laih makau kisang kidika witing yamna.

⁶¡Witing muhni tani yakat yaringni nuhni sakki! ¡Witing pāni holi yakat sakki parasni nuhni kidika dawak yaksihni kidika bik!

⁷Dawan yakat kalatanauh, tawan sulani balna, Dawan yakat kalatanauh parasni nuhni kidika dawak alasnina yaksihni kidika bik;

⁸Dawan yakat kalatanauh witing risnipik kidika; witing watakni yakat awanauh minitdis kalanin dini karuk,

⁹Dawan yakat risnipik nuhni kalatanauh witing pāni holi nuhni yamni yakat.[53], ¡Sau muihni balna bitik diyukwang witing muhni yakat!

¹⁰Nesān balna yakat diyultanauh: “¡Dawan laih king!” Witing yaklauwi sau adika pāni kat pamni kalana itiknin awas yulni; witing tawan balna pasyakat tunan kāwi bitikkau kapapat.

¹¹¡Makau kisang balna dawak sau kidika laih alasna kalalahwang! ¡Kuma kidika parasni yulwang, paskau di balna bangkidika bitik!

¹²¡Sau minitkau kidika bitik alasna duwang, dawak di balna bangkidika bitik! ¡Asangpaskau pan balna bangkidika bitik alasna duwi sararahwang,

¹³Dawan muhni tani yakat, witing sangka kidika! ¡Agha, witing kaiwi sau akat tatuna kana atnin, dawak sau akat tawan balna kidika yakat tunan kawarang la kasak dawak rahm karak!