Read Mayangna Proverbios 14 Bible Online

Proverbios 14 - Mayangna bible

Proverbios 14

¹Yal sins duwa kidika ūni yamwi; tapdadas laih, silp tingni kau daukalwi.

²Yamni yak kiwa kidika laih Dawan risnipik kalawi; dutni yakat kiwa kidika laih di dauh kulwi.

³Tapdadas tingpas kaupak witing manah kapat kaldakanin kidika kalahwi; sins duyang kungnimak kaupak laih tanit daknin kidika.

⁴Turuh ahalmuk dis kat, di minik diski; turuh almuk parasni kau, di minik mahni kalahwi.

⁵Witnis kasak kidika alas yulwas ki; witnis dauh kidika laih alas yulwi.

⁶Tapdadas kidika sins tuhni walwi kaunah yakwaski; sins sirihni muihni laih, di amanglanin kidika laih īsi ki.

⁷Tapdadas kaupak naikau lawah, witing kungnimak kaupak sip di amanglatas awama.

⁸Sins tuhni yaklauwi sins duyang yakat niningkawi yamni yakat kiwa kidika, kaunah tapdadas laih, sihm tapani dadasni yaklauwi alas kalyulwi.

⁹Tapdadas balna kidika sarahni yuyulwi pātnina yakat, kaunah barangni manah yamyang balna ahalni kidika laih di yamni kidika kulninna yakat duduwi.

¹⁰Isning kidika silp amanglawi tapahlni duwa kidika, alasnina kidika sip talwas muihni yakarak kalpakwi duduwas ki.

¹¹Muih dudutni balna ūnina laih daukalna karang; di barangni manah yayamwa balna ūnina kidik laih barakwarang.

¹²Ta kidika yamni kapat bik ki, kaunah witni yakat daunin sakki.

¹³Karinin kat bik maputki dalawi, witni kat alasnina kidika kaidinin yakat wiryaklawi.

¹⁴Tapdadas laih angkut kiwa kidika isninglak ki; muihni al yamni kidika laih witing yamwa balna kidika yakat.

¹⁵Isningpuk awas kidika laih di kalyuyulwa bitik rahm kulwi. Isningpuk kidika laih talwi angkut kiwa kidika.

¹⁶Sins duyang kidika yamaduwi, bahang dutni kaupak yaklawi, kaunah tapadadas laih isningkulwas kapat ki.

¹⁷Sirihni anwa muihni laih yul kulwas di yamwi; yul kulwi talwa muihni laih, kulnin laihwatwi.[15]

¹⁸Isningnapuk awas balna kidika laih tapdadas kidika witingna dinina; isningnapuk balna laih amanglanin kidika awaih ki.

¹⁹Muih dutni balna kidika abubukwa muih yayamni balna muhnitna yakat; muih dudutni balna kidika laih la kat balna dūrnina yakat uiwi kalnina dinit yakat bukwi yuyulwarang.

²⁰Minikunni kidika laih kaltalyang yamni balna kidika bik waihla tatalwi; di duyang laih kaltalyang yamni mahni duwi.

²¹Kaltalyang yamni yakat dauh kalkulwa kidika laih dutni as yamwi, kaunah ¡isninglak ki muih minikun yakat minikun talwa kidika!

²²Dutni yamnin wawalwa kidika laih ta didiswi; di yamni yamnin wawalwa kidika laih dalani lani dawak barangni karak ki.

²³Di yamwa bitik kidika yamni yakwi, yul mahni yulwa kidika laih, minikunni atnin manah ki.

²⁴Sins duwa kraunni kidika laih sins sirihni[16] kidika ki; tapdadas balna kidika laih, tapdadas kidika.

²⁵Witnis kasak kidika laih muih ūk sangnika laihwi yakwi; witnis alas muihni kidika laih, daunin dini.[17]

²⁶Dawan risnipik kalanin laih, tahanin parasni as ki walanibis balna yakat yamni as diawi.

²⁷Dawan risnipik kalanin laih, sangka rikni dauna wahni kaupak laihwi yakwa kidika.

²⁸mahni minit yakat kabamint kanin laih king risnipik kalanin; bulah yakat kabamint kanin laih, kaldaukalwi;

²⁹Kulnin laihwatnin laih sinsni sirihni kidika lāih yakwi; kulnin laihwatwas laih mutu.

³⁰kulnin yakat yamni manah kidika laih sangnika bik yamni, kaunah tumnin laih wakalni kat bahwi.

³¹Muih minikunni yakat taihwa kidika laih Papang yakat uswi, kaunah minikun talwa kidika laih risnipik bik kalawi.

³²Dutni yamyang kidika, dutni kidika yaklauwi kaldaukalwi; yamni manah yamwa kidika laih yamni yamwa kidika[18] nanitdakwi.

³³Sins tuhni kidika muih yul kulwi talwa sinsni yakat sakki, kaunah tapdadas balna yakat laih talwas dini as ki.[19]

³⁴La kat yamwa kidika laih nisan as ayangni nuhni kidika; dutni kidika laih witing asalni.

³⁵Dini yamyang muihni sip kidika king kulnin laihwi, kaunah di sip awas kidika laih kulnin daukalwi.