Read Mayangna Proverbios 17 Bible Online

Proverbios 17 - Mayangna bible

Proverbios 17

¹Tanit yamni ki di dadasni kaswi isning aslah atnin dawak alasna manas dunin kaunah kalbilnin manah atnin kat.

²Dini yamyang di sip kidika, walanibis dutni kidika daniwan kalwi, dawak witing laih, kidika wirahni balna dinina sahyakwi duduwa pasyakat ki.

³Gol dawak lalah kidika laih kuhpau lāih yakwi; dawak muih kulnin laih Dawan talwi.

⁴Muih dutni alas muihni kidika tu dutni yuyulwa balna yulni dakawi.

⁵Muih minikunni yakat sarahni kalyulwa kidika laih Papang yakat uswi; dutni yakat bukwak alasna duwa kidika laih wah duwas bayakwas karang.

⁶Muihbararak balna kraunni kidika laih mani balna; papang witing manah kapat kaldakawa kidika laih walanibis balna kidika ki.

⁷Mutu kidika bik yamni kaldakawas ki, yaksihn yulbauwi, dawak rispik alni kidika bik alas yulnin yamni dakawas ki.

⁸Witing yaklauwi muih tani duwak di yamwa kidika witing parasni duwa kaldakawi, di yamni laihwi, yamwa balna bitik yakat.

⁹Uswak bik dakawas kapat dawak bayakwa kidika laih dalani talnin lani kidika yamwi; kaunah wat wat yamwa kidika laih, wanaihki kidika naikau yakwi.

¹⁰Amanglawa muihni yakat bilwa kidika dalani dakawi tapdadas yakat andat wah wiswa karak dawak.

¹¹Kulnin dutni kidika laih kalbaunin manah walwi, kaunah yul dutni as kalsisihwarang.

¹²Dangkatakalbas anna karak kalpaknin kauh tanit yamni ki tapdadas di as yamnin kulwa kidika karak dawakat.

¹³Dutni kidika ūni kaupak kalahwas karang yamni kalyamwak biriwi dutni yamwa kidika.

¹⁴Was pauna kidika laih kalbaunin tunan bahwi; tanit yamni ki dawi kiunin dawak pasyakat watnin kat.

¹⁵Dutni yamna dutni dawak disnin, dawak dutni yamwas yakat pāt yakat ānin kidika di bu kidik Dawan dutni palni talwi.

¹⁶¿Tapdadas kidika ais yamwi tingni yakat lalah duaiwih, sins tuni bakannin, di amanglawas kat?

¹⁷Kaltalyang yamni as kidika laih yamni ki, kaidinin mani yakat laih wirah as kapat ki.

¹⁸Isningpuk awas kidika laih wanaihni tunan minit kawi di balna kidika witing tingni yakat duwi.

¹⁹Muih uskih kalawa kidika laih, kalbaukih ki; witingmanah kapat yulwa kidika alas dutni yakat kiwi.

²⁰Kulnin dutni kidika sip di yamni kalpakwaski; tuni alas yulwa kidika dutni yakat bukwarang.

²¹Tapdadas papangni atnin laih dalani manah duaiwi; mutu papangni atnin laih alasna as bik diski.

²²Sika yamni ki isning alasna kidika, kaunah kulnin bukna kidika laih parasni bik dis kalwi.

²³Muih dutni kidika malni kau tani duwak yamni dakawi, la kat yamnin dai kidika dutni yamnin yulni.

²⁴Sins tuhni kidika laihnin yamwi sins sirihni duwa kidika; kaunah tapdadas laih kulnin yak di diski.

²⁵Walanibis tapdadas kidika laih papangni balna kulninna daukalnin dawak tapahlni bik.

²⁶Dutni yamwas muihni yakat lalahni daknin yamni awaski dawak muih di yamni manah yamwa yakat wisnin bik.

²⁷Sins duyang balna yul bulah yuyulwi, dawak sins sirihni duwa kidika laih kus ki.

²⁸Tapdadas bik sins duyang kapat ki ap sakkat.