Read Mayangna Proverbios 18 Bible Online

Proverbios 18 - Mayangna bible

Proverbios 18

¹Witing manah dunin kulwa kidika laih walwi dini kidika, yul yamni sumalwa bitik kidika niningkauh manahki.

²Tapdadas laih di lan kalahnin kidika dukih kalawas ki; witing di amanglawa kidika manah kapat kulwi.

³Dutni lani kidika munah asalni kidika kaiwi; dawak witing manah kapat kaldakawa kidika, risnipik dis.

⁴Muih al yulni balna kidika laih was tuhni kapat ki; was kira kidika laih sins tuhni pāni.

⁵Yamni awaski pāt duwa muihni kidika wihta yaklauwi ilpni yamwarang kat dawak dutni yamwas rahmni kalalawa dawarang kat.

⁶Tapdadas kidika witing silp kungnimak munah kalbaunin yakat kawi; yulni balna kidika kau wah walwi.

⁷Tapdadas yulni balna kidika yaklauwi dutni yakat kaldukiwi; kungnimak karak dinimak wah awi.

⁸Dangnit yulnin kidika laih damni dakawi kaunah pasyakat ahlwi bayakwi.

⁹Baskiwah dawak di daukalyang balna laih ¡kalwirah kapat kalalahwi!

¹⁰Dawan ayangni laih makau kilwi talnin pāni parasni kapat ki la kat muihni balna ilp walwi uiwa kidika.

¹¹Di duyang kidika kulwi ritsni balna kidika laih tawan nuhni daklana kapat kulwi.

¹²Witing manah kapat kaldakawa usnit yakat daukalnin kaiwi; limahni kidika usnit yakat laih, baraknin lani.

¹³Tapdadas dawak asalni as ki dakawas tanit kauh nangnitlanin.

¹⁴Siknis muih kulnin yaklauwi, kaunah kulnin yaklawa kidika bukna kat ¿wais dulauwarangyah?

¹⁵Sins duyang dawak sinsnina sirihni balna baisa di amanglanin wawalwa kidika yayakwi.

¹⁶Prisant dini as yaklauwi dūr bitik apahwi dawak muih nunuhni balna bik uiwi kakawi.

¹⁷Tatuna kaupak nanitdaknin kidika yamni kapat ki, niningkauh muihni kidika kaiwi yul ūk yulnin awas yulni.

¹⁸Dawan la yamwa kidika laih kalbaunin kidika bitik disyamwi kalbibilwa kidika laihwi dakyakwi.

¹⁹Wirahni usna kidika laih putwi tawan nuhni daklana kapat tanit. Kalbaunin kidika yaklauwi dakyakwi king ūni winnidar kau ayan āna kapat.[23]

²⁰Witingna kakaswarang disuhwak kat witingna yulnina minik kidika.

²¹Daunin dawak sangka atnin kidika laih muih tuni kidika ki, yul mahni yuyulwa kidika minit laih wawauhwarang ki.

²²Yal dunin kidika laih di yamni as kalpaknin: kidika laih Papang mailpki yamwi.

²³Muih minikunni kidika laih kalni dinit yak bukwi yulwi; kaunah di duyang laih yulni parasni yulwi.

²⁴Muih as karak yamni kidika īsi dakwi kalalahwi, kaunah kaltalyang as kat barangni ki kalwirah karak dawak.