Read Mayangna Proverbios 2 Bible Online

Proverbios 2 - Mayangna bible

Proverbios 2

¹Walakibis, yulki balna kidika dima dutah; yang lāki balna kidika kulnam yakat dutah.

²Sins tuhni kidika tapayuta dakah; kulnam kidika sins sirihni yakat atah.

³Man parasma bitik karak yultah sins sirihni dawak la kat atnin kidika;

⁴muihma bitik palni āta waltah, lalah kidika awaskat di minit nuhni malna sakkat waltaman kapat.

⁵Kaput laih amanglama Dawan risnipik lanin kidika; ¡Papang amangnilanin kidika walta yakma!

⁶Dawan kuduh yaklauwi sins tuhni yuwa kidika; sins lani dawak amanglanin kidika, witing kungnimak kaupak kalahwi.

⁷Dawan laih ilp yuwi dawak nanitdaknin bik barangni palni yalalahwa balna kidika;

⁸La kat uiwa balna kidika maintalwi, witing niningyakat barangni balna kidika nanitdakwi.

⁹Dawak bik amanglama barangni dawak la kat kidika, dawak di yamni balna kidika yakat tapayuma,

¹⁰kulnam kidika sins tuhni duwarang di amanglanin damni kidika dakaman.

¹¹Barangni lakat dawak sins sirihni kidika minit bitik yakat namatdakwarang;

¹²kidika yaklauwi ta dutni kaupak malaihwi yakwarang dawak muih ahal dudutni kaupak,

¹³ta yamni dadawa balna kidika laih ta puksani yakat uiwi,

¹⁴di daukakalwa kidika alasnina dawak alalaswi di dutni yayamwa kidika,

¹⁵ta wirni yakat uiwi ta barangni kidika kaupak dawi kalalahna.

¹⁶Muih yalni kaupak bik malaihwi yakwarang kulnin laihnin yulni balna kaupak bik

¹⁷witing sirau dai kidika yakat alni dai kidik dāwi dawak Papang karak pramis dai kidika bik dinitkahwi.

¹⁸Witing yakat kiunin tani kidika dunin laih daunin tani yakat dudi mawa kapat ki;

¹⁹ūni yakat uiwi kakawa kidika laih nawatwi aiwaski, sangka atnin tani yakat watwi nawatwi aiwas ki.

²⁰Kaput bahang ta yamni yakut yawah, la kat balna yayamwa kidika yamtah.

²¹Kat barangni yakat yalalahwa balna kidika laih sau kat ban sangka karang;

²²kaunah muih dudutni balna kidika laih dutwi yakwi ruhmmukna karang sau kaupak.