Read Mayangna Proverbios 23 Bible Online

Proverbios 23 - Mayangna bible

Proverbios 23

¹Muih nuhni as di kasnin maduwi kiwak, yamni kulta talah wais muhnit yakat sakmahn.

²Yuh daunaman karang bik, ismang aitah;

³kasnin auhni kidika tumwinih, sipki alas mayulnin.

⁴Uba parasni yamwinih rits alahwakuhti; kulta kalbautaman kidika datah.

⁵Yamni talma kat, ritsni kidika diski; sirihni yaklauwi kiwi yakalnuh kapat, lawanina kalahna kapat.

⁶Dutni dukih kalawa muihni karak kalpakwinih, kasnin dini auhni duwa kidika tumwinih,

⁷kidika laih bas as dinitsuru yakat kapat ki:[33] witing mayulwi madukiwi kasnin dawak dinin, kaunah di rahm laih yulwas ki;

⁸usnit kat tamangyakma kasnaman kidika yulma yudutni yulnaman kidika dauh manah karang.

⁹Tapdadas tapani yakat yulbauwinih, sins lani yultaman kidika sarahni yulwarang.

¹⁰Lain umani balna kidika pa ūk lawinih, dawak warau saunina yakat kawinih,

¹¹kat witingna dilaihwi yaknin parasni as duduwi, nanitna dakwi, man namang yakat kalahwarang.

¹²Kulnam dawak tapama balna dakah masumalwa kidika dawak di amanglanin kidika bik.

¹³Wahma yakat barangni ātaman kidika dawinih, wah as as kidika yaklauwi sip iwas karang;

¹⁴nawatkauh laih, barangni āma kat, daunin kaupak laihta yakma.

¹⁵Walakibis, sins tuhni kidika duma kat, muih ūk alasna dis karang yang apat;

¹⁶alasna palni dakaki amput yulbaunin kaput yultang dakaki kat.

¹⁷Dutni yamyang balna yakat tumwinih; kaunah Dawan yakat ban risnipik kalatah;

¹⁸kaput laih witni kat yamni yawama[34] tahanin dutaman kidika bahwi uhwas karang.

¹⁹Walakibis, yami dakah dawak lan alahwah; ta yamni munah yawah.

²⁰Wasak muihni balna karak kalpakwinih dawak di mahni kasyang balna karak bik,

²¹kat wasak muihni dawak di mahni kasyang balna kidika laih muih miniknakunni kakalwi, dawak baskiwah balna laih asna utuhni kakawi.

²²Kaldakah, papangma mayakna kidika yakat; nanangma muihbarak kalwak dauh kaltalwinih.

²³Di rahm kidika dawak sins tuhni kidika bakantah, sumalwa balna dawak amanglanin kidika laih wauhwi bakanwinih.

²⁴Dawak papang walanibis yamni sins duyang kidika rahmni duwi isninglak dawak witing manah kapat kaldakanin;

²⁵¡Yamtah, papangma, nanangma isningnalak, dawak witingna manah kapat kaldakakawang!

²⁶Yang akat yamni yadakah walakibis, samkipla balna kidika yamni palni talah;

²⁷kat amangladas yalni, ahal manas karak kalangwa kidika, kidika laih pa kuhrna pāni binibin tuhni kapat ki;

²⁸yakmaldi tahawi dimalyang kapat, dawak yamwi muih manas disnin yulni.

²⁹¿Wais wauhwih? ¿Wais dalawak yulwih? ¿Wais kalbilwi dawak kaidih? ¿Wais kaldaknayah pini kaupak? ¿Wais talwak pukni duwih?

³⁰Wain dawas muihni kidika dawak dinin dini wisamni sat sat yamwa kidika.

³¹Wain yakat talwinih. ¡Ampat pauni kalwih dawak yaringni bik kalwi sutak yakat! ¡Ampat yudutni kawikiwih!

³²Kaunah witni yak laih sihm bil kapat ki kaswak dalawa kidika.

³³Taldas dini mating talma, kulnin dawak yulnin di pini manah;

³⁴mayamtingkat kuma pasyakat kapat kaldakama, panan nuhni tuna sutni kau alangwanaman kapat.

³⁵dawak yulma: “Yababauna, kaunah kaldakasyang dai; yawiwisna kaunah amanglatasyang dai; kaunah sahmuhki kat baisa wain waltik yawaki.”