Read Mayangna Proverbios 26 Bible Online

Proverbios 26 - Mayangna bible

Proverbios 26

¹Mukus pihni kidika laih ma daihwa kidika niningyakat yamni awaski was lauwa kidika bik yamni awas ki di mini balna kalahwa kidika niningyakat dawak tapdadas muihni kidika niningyakat bik rispik lani kidika yamni awaski.

²Sihm rumsik ta disna kapat kidik awaskat suhr ūni dis kapat, la tuhnin lani kidika laih sip witni kat kiwas karang ki.

³Aras almuk kidika laih dangni bahnin ki, biriku almuk kidika laih laihwatnin ki dawak tapdadas muihni kidika laih wisnin ki.

⁴Angdika muihni tapdadas muihni yakat nangnitlawas kidika laih, tapdadas kidika yulni sip bayakwas ki.

⁵Angdika muihni tapdadas muihni yakat nangnitlawa kidika laih amput yamwa kidika yakat yamni talwi.

⁶Tapdadas muihni yakat yamni kaltalwi yulni dakanin kidika laih makalki dakwi trabil walnin dini.

⁷Muih sakahwa barahnimak balna yamni awas kidika laih nai kiwas ki dawak tapdadas muihni kidika laih proverbios kat bik awaski ti.

⁸Kipala kidika kiwah yakat sitnin kidika laih yul rahm awaski tapdadas balna yakat rispik diyamnin awas kidika kapat.

⁹Wasak diyang muihni kidika wakal kalpawa kidika kat bik dakawas ki, tapdadas muihni kidika proverbios kidika yakat bik amanglawas ki.

¹⁰Sibang ruhmyang muihni di balna bayakwa kidika bitik yakat yuwi talwa kidika kidika laih sihm muih witing ūni yakat tapdadas muihni yakat wark kalawa kapat ki.[40]

¹¹Sul kidika laih witing tining yakna kidika lamwi kaswi dawak tapdadas muihni kidika laih baisa tapani dadaswi.

¹²Baisa yamni ki tapdadas kidika yakat tani tahanin sins duyang kaldakawa kidika karak dawakat.

¹³Baskiwah muihni kidika laih yul sat sat yulwi wark kalahnin awas yulni ta nuhni yakat laih layan as sakki ti.

¹⁴dūr kidika laih insis balna yakat wauhwi dawak baskiwah muihni kidika laih krikri yakat piramwi.

¹⁵Baskiwah muihni kidika laih di lakwi kasnin dini yakat tingni uhrawi, kaunah usnit kat tinpas yakat duwi kiunin sip awaski.

¹⁶Baskiwah muihni kidika laih baisa sins duyang kaldakawi muih tiaskaubu nangnitlawi sip balna kidika karak dawakat.

¹⁷Muih kalbibilwa pasyakat kanin kidika laih sul as tapani yakat laihnin kapat ki.

¹⁸Tunan dutni muihni as ruhmwa kidika kapat kuhpau sinibang daunin dini,

¹⁹sihm kapat ki angdika muihni witing karak kaltalyang yamni yakat alas kalyulwa kidika laih dawak usnit kat yakisdi kalyulna ta kidika.

²⁰Kuhpau kidika laih kuh dis kat pibukwi, dawak karinin yulni dis laih kalbilnin kidika dis kalwi.

²¹Kuh tuturni yamnin kat, kuhusmak kidika nid ki; kuhpau yamnin kat, kuh kidika nid ki; dawak kalbilnin karang kat, muih usyang muihni kidika nid ki.

²²Yulwi karinin yulni balna kidika laih sihm kasnin dini yudutni kapat ki, kaunah pasluih yakau daihni ki.

²³Sau suba minit yakat lalah kau kahna kidika laih yul balna yududutni kulnin lani dutni duduwa kidika ki.

²⁴Angdika muihni muih ūk yakat dutni kalkulwa kidika laih, yulbauwa mani kat witing awas kapat yamwi, kaunah kulnin pasyakat laih di dudutni balna yamnin kidika ridi kalahwi.

²⁵Dalani lani karuk yulmabauwakat rahm kalkulnah, bahang kulnin kidika laih di dudutni manah ki;

²⁶witing dutni kulwa kidika malpamkuh tarang bik, witing dutni kidika laih muih balna bitik muhnina yakat lāih kalahna karang ki.

²⁷Angdika muihni pa kudungni as kuhrwa kidika laih, kidika pasyakat kawi; angdika muihni kipala as tulwa kidika laih, sihm kidika kinipala yaklau taihwi.

²⁸Alas yulyang muihni kidika laih di rahm kidika yakat dutni kulwi,[41] yul yulwas muihni kidika laih di balna kidika pini lani manah yamwi.