Read Mayangna Proverbios 27 Bible Online

Proverbios 27 - Mayangna bible

Proverbios 27

¹Yahan mani dini kidika alasna duwinih, bahang man amanglatasman yahan mani ais kaiwarang kidika.

²Datang muih yaklau ayangma nuhni yayamwang; yamni awaski man alas ayangma nuhni yamna atnam.

³Kipala dawak kauhmak balna kidika laih tikikini ki, kaunah tapdadas kulnin daukalna kidika kauh baisa tikini ki.

⁴Kulnin daukalnin kidika laih dutni ki, dawak bik daukalwi, kaunah minit annin lani balna kidika laih sip laihwatdas ki.

⁵Baisa yamni ki barangni yaklauwi bilna atnin malni kau dalani talnin karak dawakat.

⁶Baisa yamni kalkulnin sipki yamni kaltalwa muihni yaklau dakwa kidika yakat niningkauh yaklauwa muihni yaklau umwa kidika karak dawakat.

⁷Angdika muihni kalbuhng kidika laih, amak kidika kat bik dutni talwi; yuh dauwa muihni kidika laih, di tapahlni kidika kat bik damni kapat dakawi.

⁸Di lawani kat ūni kaupak naikau kiwa awaihwa kidika sihm kapat ki angdika muihni batahnna pāni kaupak naikau likkidika laih.

⁹Isning kidika alasna yamna atnin kat, walapni kahnin dini yayamni kidika; solni kidika damni yamna atnin kat, kaltalyang yamni yulni as karak.[42]

¹⁰Man kaltalyang yamni dutaman kidika ruhmwi dawinih papangma karak kaltalyang yamni muihni balna kidika bik. Man pātma balna karak kiwinih wirahma al ūni yakat. Baisa yamni ki man ūma yaihnit muihni balna yakat yawana atnam wirahma naikau kidika karak dawakat.

¹¹Yang walakibis, sins duyang awah, dawak yang alaskina yamna awama; kaput laih nangnitnalana awaki dutni yayuyulwarang muihni balna yakat.

¹²Isningpuk muihni kidika laih yamadangni kidika talwi dawak tanitdakwi; isningpuk awas kidika laih ban tanit yakat kiwi dawak dalani kidika wauhwi.

¹³Angdika muihni kat taldas muihni as di tras yakwakat ilpni kawarang kat, asnina balna kidika dakyaktah.

¹⁴Kaltalyang yamni yakat sarahwi kalparasna atnin pukpapus kat, kidika laih sihm witing niningyakat dutni kalyamnin kapat ki.

¹⁵Muih yal as kulnin dutni kidika kapat ki was lauwa mani laihwatwas lauwa kidika.

¹⁶Laihwatnin lani kidika laih wing kidika laihwatnin lani ki kidik awaskat matingki yakat disala kidika duna atnin.[43]

¹⁷Ayan kidika laih ayan karak baini kalwi dawak muih al kidika muih al ūk karak.

¹⁸Ani panan maintalwa kidika laih ani minik kaswi; angdika muihni daniwan dini balna maintalwa kidika laih risnipik lani balna duwi.

¹⁹Mamuhki kidika was yakat lāih talda kapat, sihm kaput bik muih balna dauninna kidika lāih tatalwi.

²⁰Daunin, sau ū dawak muih tumnin lani duwa kidika laih kidika manah isninglak awas ki.

²¹Gol dawak lalah balna kidika, kuh yaklau di buswi talwi; muih kidika laih ayangni nuhni yamnin balna kidika yaklau kallaihwi tatalwi.

²²Tapdadas muihni kidika laih sip tapani dadasni kidika dawaski wauhta dawak minit lakta wat wat wauhma karang bik.

²³Sīpma balna kidika yamni maintalah, sīpma balna kidika yulni kulta kalbautah,

²⁴bahang rits balna dawak kraun balna karang bik ban kaput awaski.

²⁵Sihrsihr balna kidika kalahwi sangni kakalwarang mani kat, dawak dibasta balna kidika asang balna kaupak dakwarang mani kat,

²⁶sīpma balna kaupak unitak kidika duta prak āwama, sīpma binina kaupak lalah duta sau bakanta duma

²⁷dawak kutsma balna kaupak tāwas minit bayak duma man dawak walamabis balna kauna dina atnamna dawak man warkma kalahyang balna kidika kauna.