Read Mayangna Proverbios 28 Bible Online

Proverbios 28 - Mayangna bible

Proverbios 28

¹Dutni muihni kidika laih kiri muih as bik uiwas karang bik, kaunah la kat muihni balna kidika laih yamni kaldakakawi sihm layan kapat.

²Sau kidika dutni kat, kabamint kayang balna kidika laih baisa mahni kalwi, kaunah tunan duyang yamni kidika laih di balna kidika pini yamwas ki.

³Dutni muihni yaklau muih miniknakunni balna yakat taihwa kidika laih sihm was parasni lauwi di minik balna daukalwa kapat ki.

⁴Lā kaupak naikau kalalahwa kidika laih dutni muihni kidika ayangni nuhni yayamwi; rahm lā kat yayamwa kidika laih witing niningkauh yaklalauwi.

⁵Dutni muihni balna kidika laih la kat kidika amanglalawas ki, kaunah Dawan yakat uiwa balna kidika laih bitik amanglalawi.

⁶Baisa yamni ki mamikunni atnin dawak bik yamni atnin di duyang atnin dawak di dutni kulnin kidika karak dawakat.

⁷Papang lāni kidika kat yamwa kidika laih walabis as sinsni yamni ki, kaunah di kasyang muihni kidika laih witing papangni asalni.

⁸Tunan minit yakwi rits balna ududuhwa kidika laih, muih miniknakunni balna yakat dalani didakawa kidika yulni uduhwi.

⁹Angdika muihni Papang lani kidika yakat dakawas kidika laih, Papang bik kidika muihni minit yulwa balna kidika bik dakawas karang ki.

¹⁰Angdika muihni yaklau muih yayamni balna yakat ta dutni yakat diduwi kiwa kidika laih, witing silp laihnin dini malni kau āna kidika yakat bukna karang; kaunah yayamni muihni balna kidika laih di yamni kidika duduna karang.

¹¹Di duyang muihni kidika laih sins nuhni duyang kaldakawi, kaunah muih minikunni dawak sinsni yamni kidika laih sipki kawi talna atnin.

¹²La kat balna kidika minit bayayakwa kat, kasnin alasnina nuhni yayamwi; dutni muihni balna minit bayayakwa mani kat, muih balna kidika laih yakmamaldi.

¹³Angdika muihni dutni kidika talwas kapat kidika laih tanit yakat yamni kiwas karang; kaunah angdika muihni lāih yakwi yulwi dawa kidika laih dutni kidika dawak disna karang.

¹⁴Angdika muihni Dawan yakat rispik yamwa kidika laih alasna ki; kaunah angdika muihni tunan dadasni kidika laih dutni yakat bukna karang.

¹⁵Layan ihwa kapat kidik awaskat dangkatakalbas yuh dauwa kapat as sihm kapat ki muih dutni as tawan minikunni yakat kabamint kāwa kidika laih.

¹⁶Kabamint kayang muihni sins dis kidika laih taihnin lani kidika baisa mahwi; kaunah angdika muihni tumnin lani dis kidika laih sangnika naini duna karang.

¹⁷Angdika muihni muih as īna kidika laih sau ū yakat watwas kawi kiuna karang: ¡muih as bik sip laihwatwas ki!

¹⁸Angdika muihni yamni kidika laih laihwi yakna karang, kaunah tunan dutni muihni kidika laih dutni yakat bukna karang.[44]

¹⁹Angdika muihni witing di dahwa pāni yakat di dahwa kidika laih, kasnin dini kidika minitbayak duwi; wark kalalahwas muihni balna karak likkidika laih, sutni kalwatwa kidika laih minikunni lani kidika.

²⁰Angdika muihni yamni talna muihni kidika laih, ayangni nuhni yamna karang; angdika muihni rits balna dukih kalawa kidika laih, wah duwas laih watwas karang.

²¹Muih balna yakat satuk satuk talnin kidika yamni awaski; plawar busna bahna as minit kat bik dutni yamnin sipki.

²²Angdika muihni di dukih palni kalawa kidika laih sirihni palni ki di duyang kalna atnin yulni, dawak amanglawas ki witing minityakat minikunni lani kaiwarang kidika.

²³Ma balna bayakwa kidika karak, baisa yamni talwi dutni yulwa muihni kidika dawak ayangni nuhni yamwa kidika karak dawakat.

²⁴Di dutni yamyang karak kaltalyang yamni kidika laih papangni balna dinina malwi usnit kat dutni yamtasyang ta kidika ki.

²⁵Angdika muihni di dukih palni kalawa kidika laih kalbaunin yamwi; kaunah angdika muihni Dawan yakat yamni kulwa kidika laih, barakwi.

²⁶Tapdadas muihni manah laih witing silp kulnin lani balna kidika yakat yamni talwi; angdika muihni sins lani karuk di balna yamwa kidika laih yamni laihwi yakna karang.

²⁷Angdika muihni muih minikunni yakat ilp kalawa kidika laih, di as bik dis awas karang; kaunah angdika muihni ilp kalanin yulwas kidika laih, la nuhni palni kaltuhna karang.

²⁸Dudutni muihni balna minit bayayakwa kat, muih balna kidika laih yakmamaldi; manina witni kiwi kāwa mani kat, la kat muihni balna kidika yaklau taihwi duduwi.