Read Mayangna Proverbios 29 Bible Online

Proverbios 29 - Mayangna bible

Proverbios 29

¹Angdika muihni bibilwakat tunan dutni kalwa kidika laih, sirihni palni daukalna karang sinika dis.

²La kat balna kidika yaklau taihwi duduwa kat, muih balna kidika laih alasna kalalahwi; dudutni balna kidika kabamint kakawa mani kat, muih balna kidika laih dalani wawauhwi.

³Walabis sins duyang kidika laih papangni yakat alasna kalyamwi; la munah kalduwas atnin lani karak likkidika laih lalah kidika dauh diswi.

⁴King as la kat yamwa kidika laih, witing sauni kidika yamni yamwi; tunan minit daknin manah yamwa kidika laih, daukalwi.

⁵Angdika muihni witing karak kaltalyang yamni duwa yakat ayangni nuhni yamwa kidika laih, rahm kidika laih laihnin dini malni kau awi kalawi.

⁶Dutni yamyang niningyakat malni kau laihnin dini kidika laih witing silp dutni balna kidika ki; kaunah muih yamni kidika laih alasna yalahwi.

⁷La kat muihni kidika laih muih minikunni rahmni balna kidika kulwi talwi, kaunah dutni muihni kidika laih isning kulwas ki.

⁸Kiri yaklauwi di yamyang balna kidika laih tawan nuhni as kidika uswi dulalauwi; sins duyang balna kidika laih kulnin dulauna balna kidika laihwatwi lan ki.

⁹Sins duyang muihni as dawak tapdadas muihni as niningyakat kalbibilwa kidika laih, kulnin daukalwi, sarahni kalyulwi dawak di as bik barangni yamwas dawi.

¹⁰Muih iyang balna dawak muih dudutni balna[45] kidika laih muih yamni yakat dutni kalkukulwi dauna kat.

¹¹Tapdadas kidika laih kulnin daukalwi ais yulnin kidika bitik yakwi yulwi, kaunah sins duwa muihni kidika laih laihwatwi dispamwi.

¹²Kabamint kayang muihni yul alas balna dakawa kidika laih dini yamyang balna bitik kau dutni diyammukwi.

¹³Tahna duna muihni kidika dawak taihyang muihni kidika karak witingna di satuk satuk duduwi: Dawan yaklau witingna bu yakat miniknapa diana.

¹⁴King as muih miniknakunni balna yakat kulnin yamni karak king kāwa kidika laih, witing tronni kidika laih ban kaput atnin yamwi dawi.

¹⁵Dalani dawak bilna karuk amanglanin ki, kaunah walanibis dalani talwa kidika laih nanangni yakat asalni yakwi.

¹⁶Dutni yamyang balna kidika mahni kakalwa kat, dutni lani kidika laih minitbayak kalwi; kaunah muih yayamni balna kidika laih kidika muihni balna didiswakat tatalna karang.

¹⁷Walamabis yakat barangni kalyamtah dawak witing yamwakat kulnam alasna yalahma, dawak ismanglak lani balna kidika mahni palni mana karang.

¹⁸Angdika pāni yakat ta yamni kidika dis laih, di as bik yamni diski; ¡angdika tawanni Papang lāni kat dakawi yamwa kidika laih alasna ki!

¹⁹Muih dini yamyang yakat yul karak manah barangni yamdaski, kat amanglawi kaunah yul dakawas ki.

²⁰Baisa yamni ki tapdadas yakat tahanin kidika kulwi talwas yulbauwa muihni kidika karak dawakat.

²¹Angdika muihni witing dini yamyang yakat baisabin kaupak dalani kaltalwa kidika laih, witni kat kaidana karang.[46]

²²Angdika muihni sirihni kulnin daukalwa kidika laih, kalbaunin yamwi dawak di dudutni manas bik yamwi.

²³Angdika muihni witing manah kapat kaldakawa kidika laih sau yakat kallaknin ki, kaunah angdika muihni buknin lani duwa kidika laih rispik kalyamnin ki.

²⁴Di malyang ilpni yulyang kidika laih witing silp muihni kidika yakat dutni talwi, lakaltuhwa kidika dakawa karang bik[47] witing yulni kidika yulwi yakwas ki.

²⁵Yamadunin kidika laih muih balna niningna yakat malni kau awi laihnin dini as ki, kaunah angdika muihni Dawan yakat yamni kalkulwa kidika laih tingni dinit yakat awi duna karang.

²⁶Muih mahni kidika kabamint kayang ilpni kidika wawalwi, kaunah Dawan manah la kat kidika yamwi.

²⁷Muih yayamni kidika laih muih dudutni balna yakat sip wawauhwaski, dawak dutni muihni balna kidika laih muih yayamni balna yakat sip wawauhwaski.