Read Mayangna Proverbios 30 Bible Online

Proverbios 30 - Mayangna bible

Proverbios 30

¹Agur sinsni lani balna, Jaqué Masa walanibis. Agur yaklau Itiel dawak Ucal kidika balna yakat aput yuldibauna dai:[48]

²Yang laih muih balna pasyakat sins disyang, yang laih muih sinsni disyang.

³Baisa sins dutasyang, holi lani kat bik amanglatasyang.

⁴¿Wais makau kisang yakat kilwi kiunayah dawak yaklakwi kainayah? ¿Wais sipyah wing kidika tingni kau laihwatna atnin? ¿Wais yaklau kuma kidika witing kalmuknin dini kidika kau balakwih? ¿Wais yaklau sau kiwi watwa balna kidika āna yah? ¡Man yayulwinih ayangni amanglataman, dawak walanibis ayangni kidika bik!

⁵Dawan laih angdika muihni balna witing yakat yamni kalkukulwa balna kidika witing tingni dinit yakat awi duwi; witing pranimis balna bitik laih yamni kulna ki.

⁶Witing ais yulwarang kidika yakat di as bik minitlakwinih; kaput awas karang kat, mabilnin sipki dawak alas yulyang muihni makulna karang.

⁷Di bulibitlah mayulnayang, Papang; baisa dautasyang tanitkauh yatah:

⁸alas lani kidika yang kaupak naikau yaktah, dawak di duyang dawak mikunni bik yayamwinih; kasnik dini kidika manah yatah,

⁹kat sutni yawatwarang kat, matalasyang atnik sipki dawak amangmalatasyang atnik bik sipki; dawak sutni yawatwarang kat, malnik sipki dawak kaput man ayangma yamni kidika yakat dutni yulna atnik.

¹⁰Muih dini yamyang kidika yakat dutni yulwinih daniwan muhni yakat, bahang la matuhnin sipki dawak tranibil balna kidika wauhna atnam.

¹¹Muih as as laih papangnina kidika yakat lakaltutuhwi dawak nanangnina yakat laih blis kalyayamwaski.

¹²Muih as as laih maisihni dis kaldakakawi, dawak maisihni duduwa kidika kaupak baisa maisihni dis kakalwas ki.

¹³Muih as as laih nuhni kaldakakawi, dawak muih balna yakat nuhni kaldakawi tatalwi.

¹⁴Muih as as laih isparah duduwi ananina kauh duninna pāni yakat dawak kuhbil duduwi sukninapala kauh duninna pāni yakat, bitik kau dismukna atnin yulni sau muihni miniknakunni balna yakat.

¹⁵Walabis yayal bu duwi kidika balna laih muih kau yulwi dunin manah ki, sip isningnalak awaski:

¹⁶sau ū kidika, muih yal walabis yakwas kidika, sau was dis kidika dawak kuhpau sip di isninglakwas kidika.

¹⁷Angdika muihni papangni yakat dauh kaltalwa kidika dawak nanangni muihbarak[49] yakat sarahni kaltalwa kidika laih, minikpa balna kidika kuparis balna yaklau yakninna ki dawak muihni nuhni kidika laih yakal balna yaklau kasninna ki.

¹⁸Di bās rauki, dawak arungka kat bik, lāih nikingkakawas ki dawak bik sip amanglatasyang:

¹⁹yakat tani kidika laih makau kisang yakat, bil tani kidika laih kipala balna yakat, kuring nuhni as tani kidika laih kuma yakat, dawak muih al tani kidika laih muih yal yakat.

²⁰Muih yal barangni awas kidika laih adika dini yamwi: di kaswi, tinipas suhwi dawak lāih yulwi di dutni as bik yamwas ki.

²¹Muih satni balna kidika bās dawak arungka kat bik duwi, kidika balna niningna yakat laih sip wauhdaski dawak bik witingna yaklau yayamwakat sau kidika isihwi:

²²muih dini yamyang as king kalwa kidika, muih mutu di kasnin dini minitbayak duwa kidika,

²³ruhmwi dana yalni as alni yakwa kidika dawak muih dini yamyang yal as witing daniwan yal pāni yakat kawi duwa kidika.

²⁴Sau yakat didauh satni binina arungka duwi witingna laih baisa sins duduwi sins duyang balna kidika karak dawakat:

²⁵kiki balna mahni parasnina dis ma daihwa mani yakat kasninna dini walwi duduwa kidika;

²⁶tibam balna, mahni palni bik awas kipala nunuhni balna walsah yakat yalalahwa kidika;

²⁷wadau balna, kingnina dis karang bik yamni tanitna kat uiwa kidika;

²⁸kamasihrka balna tingpas nakaslah karak laihda karang bik king ūni kat uiwa kidika.

²⁹Kulnin dadasni kidika satni bās dawak arungka kat bik duwi, kidika balna laih yaksihn tatuna duduwi:

³⁰layan, didauh as yamadangni di sa bik dawak muih as bik niningkaupak kiras kidika;

³¹sakara almuk witing manah kapat[50] kaldakawa kidika dawak kuts almuk kidika bik dawak king as witing kalbauyang muihni duwa kidika balna taninatuna duwa kidika.

³²Mutu man kapat kaldaka dawak di dudutni balna yamnin kulnaman kat, yul kulta talah

³³tāwas kidika kawaihma kat, butar yakma ki, parasni sarahma kat, nangmatak kaupak ā kalahwarang ki, dawak muih ūk yakat usma kat, kalbilnin yakma ki.