Read Mayangna Proverbios 31 Bible Online

Proverbios 31 - Mayangna bible

Proverbios 31

¹Masa kaupak king Lemuel kulnin lani balna yulna kidika, kidika balna karak witing nanangni yaklau sumalna dai:

²Yang walakibis al, yang bāki kaupak, yang Papang kalni dinit buktik yulting kat yadakawi biriwi nangkitlana kidika, ¿ais baisa mayulkiyah?

³Man parasma balna kidika muih yayal balna karak diswinih, bahang kidika balna yaklau yayamwakat king balna kidika didiswi.

⁴Dawak yamni awaski, Lemuel, king balna dawak kabamint kayang balna bik wain dawak dinin dini pararasni balna kidika dina atninna,

⁵bahang sipki lā kidika dinitnakahninna dawak muih buknin lani duduwa balna rahmnina kidika yakat dutni yamna atninna.

⁶Wain dawak dinin dini balna pararasni kidika bik datah kulninna bukna balna kidika dinina;

⁷¡didiwang dawak watwi isningnakakatwas kawang miniknakunni kidika dawak dalani wawauhwa kidika bik!

⁸Yulma kidika parasni yultah parasni yuyulwas balna kidika yulnina; ¡tanitna daknin muihni dis kidika balna yakat tanitna daktah!

⁹Yulma kidika parasni yultah, dawak la kat kidika diyamtah; ¡muih miniknakunni balna dawak kulninna buknin lani duduwa kidika yakat bik tanitna daktah!

¹⁰Muih yal di yamni yamwa kidika yaknin isi awaski; ¡kipala minit nunuhni balna kidika karak bik baisa minit nuhni ki!

¹¹Witing alni kidika laih yamni kalkulwi witing yakat, dawak di balna minit kau lāwi dunin kidika bik ban kaput duwi.

¹²Witing alni yakat di nunuhni balna kidika kalawi witing sangnika bitik yakat.

¹³Sīp unitak dawak linin asnina kidika bik walwi kiwi, dawak ting warkni balna kidika yamkih yamwi.

¹⁴Sihm witing kidika bakannin dini balna duainin kuring nuhni kapat, kasnin dini balna kidika pa naikaupak duaiwi.

¹⁵Baisa payahlawas kau yaklauwi dawak walanibis balna dawak dini yamyang yayal balna yakat bik di diawakat kakaswi.

¹⁶Sau kidika yamni lakwi talwi dawi bakanwi, dawak witing minit kau yakna lalahni kidika karak wain balna dahwi.

¹⁷Parasni prakni kidika kawi dawak kulnin dulauwi wark kalahwi.

¹⁸Witing lalahni warkni kidika maintalwi yamni tanitna yakat kiuna atnin yulni, dawak pukta kidika pukna nai wark kalahwi.

¹⁹Witing silp tingni karak wahni balna kidika yamwi dawak bik karwi.

²⁰Witing laih ban kaput tingni kidika uhrwi muih miniknakunni balna dawak dukih diawa balna yakat bik.

²¹Witing sulani balna yulnina yamaduwas ki mukus pihni bukwa mani kat, witing walanibis balna bitik kidika prak tubakni yamni kakana bahang.

²²Witing silp yamwi umukni balna kidika, dawak asna yayamni balna kidika manah kawi.

²³Witing alni kidika laih tawan nuhni yakat muih balna bitik yamni amangnilalawi, dawak kidika sauni muihni nunuhni dikulna balna kidika pasyakat witing bik nuhni kalkulna ki.

²⁴Witing laih prak nunuhni balna kidika dawak banimak yakat sitnin dini balna kidika bik yamwi, dawak di bakanyang muihni balna yakat wauhwi dibakanwi.

²⁵Parasni dawak bik yamni prakni kidika kawi, dawak yahan mani dini kidika yulni kulwi kalbauwas ki.

²⁶Sins lani karak yulbauwi, dawak sumalwa balna kidika dalani lani karuk yamwi.

²⁷Ūni yakat kiunin kidika ridi ki, dawak wat as bik kaswas ki witing yakwas dini kidika.

²⁸Walanibis ahal balna dawak alni kidika yaklau ayangni nuhni yamwi aput kalyuyulwi:

²⁹“Muih yayal yayamni laih mahni palni ki, kaunah man laih bitik pasyakat baisa yamni palni man.”

³⁰Yayamni kidika laih alas manah ki, nuhni yaksihni kidika laih dauh manah ki, kaunah angdika yalni Dawan yakat rispik yamwa kidika laih ayangni nuhni yamna atnin ki.

³¹¡Tawan muihni balna bitik muhnina yakat ayangni nuhni yamtanauh! ¡Di tras kalatanauh di balna bitik yamna kidika yulni!