Read Mayangna Proverbios 6 Bible Online

Proverbios 6 - Mayangna bible

Proverbios 6

¹Walakibis, kaltalyang yamniman kidika muihni di as yakwak ilpni āwaman kat kidika awaskat talasman muihni kidika tunan minit āwaman kat,

²man alas laihnin dini malnikau āna yakat buktaman: man silp yulbautaman kidika karak bukma.

³Kidika kaupak pri alahwanam kat, walakibis, muih ūk tingni yakatman, adika yamtah: man manah kapat kaldakaman kidika dalpamdata, dawak kaltalyang yamni mana yakat minit kalyultah.

⁴Kaminih, minit as bik wingmata puhwinih.

⁵Sana as di iyang muihni yakat talwi kira kapat irah; dawak uhu as laihnin dini malni kau āna kat talwi kira kapat irah.

⁶Yawa talah kidika yakat, baskiwah muihni; di yamwa yakat talah, dawak lan alahwah:

⁷muih as bik diski witing yakat wark paknin dawak muih diski kalyulnin adika yamtah,

⁸kurih yakat witing kasnin balna kidika puwi duwi, di minik bahnin mani yakat puwi duwi.

⁹¡Baskiwah, amaman kidika datah! ¡baisa kalangnin awaski!

¹⁰Man mamakauhwak arahntaman, dawak kalwakaihtaman, tanit yamni kaminin yulni,

¹¹minikunni atnin kidika kaiwi mabauwarang Bakus as kalbaunin dini duwa kapat.

¹²Muih dutni kidika laih alas manah yulwi likki;

¹³minikpa suyungwi, kalni kau bik wayani yamwi, dawak tingni bikisni kau bik sain yamwi;

¹⁴Witing kulnin kidika laih dutni ki, di dutni yamnin kidika manah kulwi muih kalbaunin kamanah yamwi.

¹⁵Kidika bahang minit as yakat, dutni kidika kaiwarang ki; mamakpa sipikta sahmuhtang kat di as yamnam bik sip-awas karang.

¹⁶Di tiaskauas ki, tiaskaubu kat bik ki, Dawan, bitik palni dutni talwi:

¹⁷Miniknapa dadasni tatalwa kidika, tuni alasmanah yulwa kidika, tingnina kau muih dutni yayamwas balna yakat ihiwa kidika,

¹⁸kulninna yakat di dutni yamnin kukulwa kidika, kalnina kau kikira kidika di dutni yamkih diawak,

¹⁹witnis dauh alas muihni kidika, witing yamwak kalwirah karak kalbabauwa kidika.

²⁰Walakibis, kulnam yakat ban āta dutah papangma lani balna dawak sumalna kidika bik.

²¹Ismang yakat ban kaput yaduyawah, damamak yakat sitta dutah.

²²Angkat alahwa yawaman kidika tāmatuna kawi kiwarang, namatdakwarang, amangkat, dawak sahmuhtang kat man karak yulbauwarang.

²³Rahm kidika laih la balna dawak sumalna balna kidika laih awas dahlna as ki; barangni kalyakwa kidika dawak yul sumalwa kidika kidika laih sangka atnin tani.

²⁴Yal dutni kidika kaupak namatdakwarang, muih yalni yulni balna damni kidika.

²⁵Datang kat muhni yaksihn kidika yaklauwi, dukih mawa kidika malaihwarang; ¡minikpa matalwa kidika datang malaihnin awaski!

²⁶Yal as ahal manas karak kalangwa kidika laih kasnin dini walwi kiwi, kaunah marid lani bahyang kidika laih muih al yakat walwi kiwi.

²⁷Wais kat pasni yakat kuhpau uhwa kidika laih, prakni bik buswarang ki.

²⁸Kuh tuturni minityakat lapakwa kidika laih, kalni buswi.

²⁹Muih yalnina karak kalbalakwa kidika laih, wah duwas laih bayakwas karangki.

³⁰Muih as bik dauh kalkulwas awaski dimalyang yakat witing yuhdauwa kidika yulni di malwa kidika;[2]

³¹di malwak lalaihwarang bik, di malna kidika wat tiaskaubu minit yakat lakwi kalawarang, di duwa kidika bitik bik kalawarang.

³²¡Ais isningpuk awasyah witing muih yalni karak likkidika! ¡Wais kaput yamwa kidika silp kaldaukalwi!

³³Baunin dawak dutni kalyulnin balna niningyakat yaklauwarang, risnipik dis kalwa kidika ban kaput karang, diswas.

³⁴Kat al, yal minit-anyang kidika laih kuhpau kapat ki, biri kalyamnin awarni kaiwak dawak bayakwas ki;

³⁵uswas danin kidika dukih kalawas ki, di prisant balna kidika bik kulnin yamni kalwas ki.