Read Mayangna Proverbios 7 Bible Online

Proverbios 7 - Mayangna bible

Proverbios 7

¹Walakibis, yulki balna daka yamtah; yang laki balna kidika kulnam yakat āta dutah.

²Laki balna dawak sumaltayang balna kidika daka yamtah; muih yal bin mamakpa sumani talaman kapat apaktah, kaput laih sangka awama.

³Tingma bikis balna yakat sittah, dawak kulnam yakat āta dutah.

⁴Sins tuhni kidika wirahma yal yamtah, sins sirihni kidika kaltalyang yamni alahwah.

⁵Kidika balna yaklauwi yal la bahyang kidika kaupak malaihwi yayakwarang yul kau kulnin laihwa yalni as talasman kidika.

⁶Ma as kat yang talasakyang kat winkidar yakat

⁷Wawahma di amanglalawas balna kidika yakat, dawak talnayang kidika balna pasyakat tanit isning aiwas kidika.

⁸Sipintang yakat kiwi tabadakna kidika yalni ūni niningyakat.

⁹Uman masan dai, mahka puksani kalwadai.

¹⁰Yal kidika sirihni niningkauh kalahwi kiuna, ahal manas karak kalangwa yalni amput yamwa kidika bitik yamna,

¹¹yal as sirihni, ting di yamwa kidika witing ūni yakat sip sak-awas kidika

¹²tapas yakat, muih kalududuhwa pāni yakat bik likkidika tahawi angdika tatuna bayakwak laihna atnin.

¹³Yal kidika wahma yakat laihwi umna, dawak asalni dis kalyulna:

¹⁴“Pramis yamnayang dai warmani, watwi wanaihni karak yamni kalahnin sakripais kidika yamnin, bahang warmani prakimis kat yamnayang.[3]

¹⁵Kidika bahang namangkauh alah'aiwayang; ¡matalkih yana dai, bahang kalpakdi!

¹⁶Paki minit yakat rinayang linin asnina Egipto yakat yamna kidika nuhni kat,

¹⁷di walapni kau kahnayang mirra, áloe dawak canela.

¹⁸Aiwah, dalani talnin sūnitak pasyakat mahawang; dalani talnin alasnina dudang payahlawak kat,

¹⁹Yang alki laih ū yakat diski: kalahwi pa naikau kiuna;

²⁰lalah mahni duwi kiuna waraput laih kaiwas ki, waiku diknipih mani kat kaiwarang ki.”

²¹Witing yulni damni wat wat yulna bahang wahma kidika kulnin laihna,

²²yal kidika usnit yakat kiuna: turuh almuk as inin pāni yakat duwi kiwa kapat, sihm sana as laihnin dini malnikau āna yakat bukwa kapat

²³tihndawak sibang as witing putni minik pawi sahwi; sihm uhubin as daklana lilingni yakat kiwi bauwa kapat amanglawas ki, witing sangnika diswarang kidika.

²⁴Kaput bahang, walakibis dakah; yang yulki balna kidika dakah.

²⁵Man kulnam, kidika yalni yakat datang kiunin awaski; kidika yal dangnit yakat kiwi pini diswinih,

²⁶kat manas palni laih daunin yakat diduwi kiuna; ¡ina balna kidika laih mahni ki!

²⁷Witing ūni yakat kiunin tani kidika dunin laih daunin tani yakat laihda kapat ki.