Read Mayangna Eclesiastés 10 Bible Online

Eclesiastés 10 - Mayangna bible

Eclesiastés 10

¹Markisah as dauna kidika laih wayāni ki dawak kahnin dini walapni kidika diswi. Di dauh kidika laih baisa sirihni yulwi sins tuhni rispik nuhni duwa kidika karak dawakat.

²Sins duyang kulnin kidika laih di yamni yakat kulwi, kaunah tapdadas kulnin kidika laih di dutni yakat kulwi.

³Tapdadas muihni di yamwa balna bitik kidika laih, kulnin lani balna minikunni kidika lāih yakwi, witing yaklau baisa aput yulwa kat tapdadas balna laih mahni ki.[13]

⁴Kabamint kawa muihni kidika man karak kulnin daukalwarang kat tunama kidika diswinih; di mistik nunuhni balna sinika kidika laih di balna kidika tani tani yamnin ki.

⁵Di mistik as kidika amanglanayang adika sauni akat yamwa kidika, dawak kabamint kayang balna kaupak kalahwa kidika:

⁶tapdadas yakat laih tunan nuhni ahawi, dawak nuhni dikulna muihni balna kidika laih wark dibin kat diayawi.

⁷Muih dinina yamyang balna kidika aras kau kilkiwak talayang, dawak king walanibis balna kidika laih kalkau lapapakwi sihm muih dinina yamyang balna kapat.

⁸Angdika muihni pa kudungni kuhrwa kidika laih, kidika yakat kawi. Daklana bahwa kidika laih, bil kalkaswi.

⁹Angdika muihni kipala sahwa kidika laih kidika balna karak dalani duwi. Angdika muihni kuh sahwa kidika laih, sipki kaldakna atnin.

¹⁰Ki kidika tumukni kalwak watwi baini yamwas laih, baisa parasni wauhnin ki. Baisa yamni ki di balna kidika yamni yamna atnin sins tuhni karak.

¹¹¿Yamni talwa muihni kidika ais as ilp yah bil kidika yaklau kaswa kat yamni kaltalwas tanitkauh?

¹²Sins duyang yulni balna kidika yamni talna ki, kaunah tapdadas yulni balna kidika laih witing alas kaldaukalwi:

¹³di dauh yulni manah yulwi, dawak witni kat sins dis yulni balna manah yulwi dawi.

¹⁴¡Tapdadas kidika yulbaunin dini dis laih awaski! ¿Wais yaklau yulnin sipyah di balna kalahwarang kidika di balna baisa kaiwi kalahwas kidika muih as bik amanglawas kat?

¹⁵Tapdadas kidika laih wark parasni kalahwi muihni iwi, tawan nuhni yakat kiunin tāni kat amanglawas bik.

¹⁶¡Alakaih, sau as witing muihbin kat king āna duwa kidika, dawak king walanibis balna kidika laih kasnin alasnina yakat payahlalawa kidika!

¹⁷¡Alasna yamni karang sau as rispik kingni kat duwa kidika, dawak kabamint kayang balna kidika laih di kasnin awarni kat kakaswa kidika, witingna parasnina duna atnin yulni dawak wasak diwi daunin laih awas!

¹⁸Baskiwah muihni kidika laih ūni basni kidika bukkiwi; dawak di as bik yamwas muihni kidika laih ūni bitik bukkiwi.

¹⁹Plawar busna kidika laih alasna dunin dini, dawak wain kidika laih sangnika alasna dunin dini; kidika yamnin laih lalah wantki.

²⁰King yakat niningkauh yulwinih kulnam kau kat bik kulwinih. Di duyang yakat dutni kalyulwinih, man alas sak-awama karang bik, kat di lawani balna kidika laih yaklauwi awawaihwi dawak dakawi uiwi kalyulninna sipki.