Read Mayangna Eclesiastés 11 Bible Online

Eclesiastés 11 - Mayangna bible

Eclesiastés 11

¹Plamawar busna kidika was yakat ruhm'atah; ma as walta yaknaman karang.

²Di dutaman kidika muih yakat yutah ais sipman yakat, bahang amanglatasman sau minityak ais kaiwarang kidika.

³Mukus balna kidika was duwa kat, was lauwarang kidika laih sau minityak utuhwi. Pan kidika tingpal niningyakauh bukwarang kidika awaskat, wadah niningyakauh bukwarang, angdika pāni yakat bukwarang kat, kidika yakat bukwi tuskarang ki.

⁴Angdika muihni wing yakat talwa kidika laih, di dahwas ki, dawak angdika muihni mukus yakat talwa kidika laih, di dahwi minik yakwas ki.

⁵Wing angkat kiwa kidika amanglatasman kaput, dawak muihbin kidika nanangni bani pasyakat amput kalwa kidika, kaput bik laih man Papang di yamwa kidika amanglatas man, di balna bitik yamyang muihni kidika.

⁶Di minik balna kidika mapiris niningkauh dahtah, dawak ma ulahu yakat bik dahtah, kat amangladas ki angdika kauh yamni kalahwarangpa, tatuna dahnaman kidika karangpa kidik awaskat usnitkauh dahnaman kidika karangpa, kidik awaskat bupak bararakwarangpa.

⁷Yaringni kidika laih yamni palni ki, dawak mamikpa kidika bik yamni ki ma kidika talna atnin;

⁸kaunah muih as kurih mahni sangka karang dawak kidika balna bitik kau alasna duwarang bik, witing isningkatna atnin ki puksani mani balna kidika laih mahni kidika, dawak di balna kaiwarang kidika laih dauh manah ki.

⁹Wahma, alasna dutah, waradika man sangmaka yamni dutaman kidika; di yamni kidika karak alasna dutah warmani sipman kidika yakat. Datangkat man ismang dukih kalawa kidika yaklau maduwi kiwang, di balna talaman bitik yakat, kaunah ismang-aitah kidika balna bitik laih Papang yaklau mayulwi dakawarang ki.

¹⁰Kulnam kaupak kulwi kalbaunin kidika naikau yaktah dawak dalani wauhnin kidika man kaupak yaktah, kat wahma mani yakat ma balna yamni kidika laih dauh manah ki.