Read Mayangna Eclesiastés 12 Bible Online

Eclesiastés 12 - Mayangna bible

Eclesiastés 12

¹Waradika man wahma man kidika yakat kulta dakah man mayamna muihni kidika yakat dawak ma balna dudutni kidika laih baisa kaiwi kāwaski; uman kurihni balna aiwarang ki dawak man lauwa yulma: “Sangka atnik alasnina as bik duaiwi yāwaski.”

²Waradika yamtah, baisa ma, waiku dawak yala balna yaringni kidika puksani kalwas yakat, dawak was lauwak usnit kat mukus bik duwa kidika yakat.

³Ma as kiwi kawarang ki king ūni maintalyang balna kidika diyuknin kidika dawak kulninna dadasni balna bik limbabahwarang kidika; di tiknin dini balna kidika bulah palni wawatwarang ki, dawak di titikwas karang ki; windar munah tatalwa muihni balna kidika laih, miniknapa kidika di talwas kakalwarang ki.

⁴Kidika mani kiwi kawarang kat, ta nunuhni balna yakat dūr balna kidika putwarang ki; di tikwak parasni yulwa kidika laih diswi kiwarang ki; di lawani duyang balna unbabauwa kidika laih muih balna dakakana karang, kaunah unbauna balna kidika laih muih dakawas dadawarang ki;

⁵maluihni kidika laih yamadunin kalahwarang, dawak ta balna yakat laih yamadangni kidika manas palni kalahna karang ki. Almendro kidika puluna karang, sisin kidika laih truknin dini as kalna karang dawak alcaparra[14] kidika laih yus dis kalwarang. Kat muih al laih mahka kiwa bahang ūni ban atnin kaput yakat, tapas yakat uman dakawi wanaihnina dadauna kat kakaida kidika.

⁶Ismangkattah Mayamna kidika yakat, di wahni lalah kau yamna kidika dawak gol subani kidika baisa sahwas yakat; dawak was butnin dini kidika bik sahwas ki wastuna yakat dawak was murilwa dini yakat bik bahwas ki.

⁷Adika usnit kat yahamni kidika watwi sau yakat kiwarang, muhnilau dai kaput, dawak spirit kidika nawatwi Papang yakat kiwarang, witing yaklauwi kalana dai kidika.

⁸Yang, sumalwa muihni as yang, wattik yultayang: ¡kulwa balna kidika dauh manah ki, kulwa balna kidika dauh mamah ki! ¡Bitik kidika laih kulwa kidika dauh manah ki!

⁹Muih kau sumalwa muihni kidika sins duyang palni kalna kat, baisa muih balna yakat diawa dai. Dawak sins lani balna bik mahni laihwi talna, dawak satni balna mahni kidika pāni kat kat āna.

¹⁰Witing sip palni yamwadai yulni balna kat kat yakwi ulnin yulni balna rahm kidika.

¹¹Sins duyang balna yulnina kidika laih di subangni kapat as ki, kidika balna bitik walwi ududuhwa kat sihm pan subangwi uhukna bang kapat ki, sīp maintalyang as yaklauwi yamna kidika.[15]

¹²Kidika kaupak yakda kidika laih maisingpaknin nuhni as ki.[16] Wauhtaya mahni yamnin kidika laih sip witni yakat mawas ki, dawak di manas laihdi talda kidika bik maisuhwi.

¹³Yulbauna balna kidika dahn kalna. Uman bitik yulna. Papang risnipik kalatah lani balna kidika yamtah, kat muih al yamnin laih kidika manah ki.

¹⁴Papang yaklauwi maiyulwarang ki di balna yamda bitik kidika, yamni kidik awaskat dutni, dawak malni kau yamnamayang karang bik.