Read Mayangna Eclesiastés 2 Bible Online

Eclesiastés 2 - Mayangna bible

Eclesiastés 2

¹Yang alas muihki yakat bik aput yulnayang dai: “Waradika laih laihtik talki ki, alasna dutinah; sangkika kidika yamni palni duki ki.” ¡Kaunah adika kat bik dauh alas manah dai!

²Dawak amanglanayang dai karinin kidika laih dauh manah ki dawak alasna kidika laih di bik awaski.

³Yang kulnik kidika sins tuhni kidika dinityak, wain prisantni kidika laihtik talnik kulnayang dai, dawak kidika yakat āwanayang dai amanglana atnik muih kidika rahm kidika dini kauh dunin dini pa sau akat mani parahni yakat.

⁴Wark nunuhni yamna dai; ūki nunuhni balna yamnayang dai; yang silp wainki balna dutayang dai.

⁵Yang silp yakimak yakat dawak dipulu dahnik pāni yakat di dahtik yaktayang dai, dawak kidika yakat pan minik satni balna kidika dahnayang dai.

⁶Was laihwatnin pāni yamnayang dai was laihtik pan dahnayang balna kidika was utuhna atnik yulni;

⁷muih ahal dawak yayal muih dinina yamyang balna bakannayang dai, dawak diki yamyang balna yang ūki kat batatahnna balna bik dutayang dai; turuh yayal dawak sīp balna bik mahni dutayang dai muhnilau kau Jerusalén yakat duduwadai kidika karak dawakat.

⁸Gol dawak lalah bik mahni palni uduhnayang dai, di minit nunuhni balna muhnilau kau king ūk balna dawak sau sahyakna balna ūk dinina dai kidika. Unbauyang ahal dawak yayal bik dutayang dai, mamuihki nuhni dukih kidika dawak ial ūk ūk balna bik.

⁹Nuhni kulna muihni as yang dai, dawak di manas palni dunayang dai muhnilau kau Jerusalén yakat duduwa balna dai kidika karak dawakat. Baisa kidika minityak, sins tuhni kidika laih yaruhmwi dawasdai.

¹⁰Wat asbik dukih lani balna kidika yakat dikah yultasyang dai; wat as bik alasna dunin lani kidika yakat yultas laih awasyang dai. Ising karak alasna dunayang dai warkki balna bitik yakat, dawak kidika alasnina yaklau mikit yana.

¹¹Usnit kat yang silp warkki balna dawak wark yamnik dadasni dai kidika yakat bik kultik talnayang dai, dawak amanglanayang dai kidika balna bitik laih dauh alas manah kidika, kidika laih wing kidika yakat laihnin yamda kapat dai, dawak adika sauni akat di as bik yakdas kidika.

¹²Usnit kat sins tuhni kidika yulni, sins dis dawak tapdadas lani kidika bik kultik talnayang dai: ¿Ais baisa yamwarangpah yang uskitkauh king kawarang kidika, muhnilau kau di balna kidika uman yamna kat?

¹³Dawak yaknayang dai sins tuhni kidika kauh di kalahwi tapdadas lani karak dawakat, sihm yaringni kidika kauh di kalahwa kapat puksani kidika karak dawakat.

¹⁴Sins duyang kidika laih minikpa balna kidika yamni di talwi, kaunah tapdadas kidika laih sip di talwaski. Kaput bik, amanglanayang muih balna bitik yakat kaput dikalahwarang ki,

¹⁵dawak alas muihki yakat aput yulnayang dai: “Tapdadas yakat kalkalahwarang kidika laih yang akat bik yakalahwarang ki, kaput bahang sins tuhni nuhni dunik kidika laih dauh manah ki. ¡Kidika kat bik yul alas dauh manah ki!

¹⁶Kat muih as bik isningkatwas karang ki sins duyang kidika yulni dawak tapdadas kidika yulni bik; ma balna bayakwi kiwa kidika karak bitik madikitkahwi, dawak sins duyang dawak tapdadas kidika laih sihm papatni dadauwi.”

¹⁷Sangka atnin kidika yakat dutni kulnayang dai, bahang adika sauni akat di balna yamnin dini balna bitik laih yang nikingkauh manah kalahwadai. Rahm palni kidika laih, di bitik kidika dauh alas manah ki, ¡kidika laih wing kidika yakat laihnin yamda kapat as ki!

¹⁸Adika sauni akat wark balna yamnayang dai kidika bitik bik dutni talnayang dai, bahang kidika balna bitik laih yang uskitkauh kaiwa kidika tingni yakat danik dai.

¹⁹Dawak di aslah laih rahm palni dai: witing laih uman sins duyang kidik awaskat tapdadas atnin dai, adika sauni akat di balna bitik sins tuhni karak dawak wark parasni karak yamnayang dai kidika daniwan kalwarang ki. ¡Dawak adika bik sihm alas dauh manah ki!

²⁰Adika sauni akat di yamnayang dai kidika talnayang mani kat, wark parasni alahwanayang kidika yulni dalani dakanayang dai,

²¹bahang muih as sakki witing warkni yakat sins tuhni dawak amanglanin dawak di talna dini balna bik āwa kidika, muih wark kalahwas dai kidika yakat bitik palni kalana atnin yulni. ¡Dawak adika bik sihm alas dauh manah ki, dawak la kat bik awaski!

²²Witni kat, ¿muih kidika ais yakwih adika sauni akat wark parasni kalahwi dawak uba palni bik kulwi kalbauwi?

²³Witing sangnika bitik laih dalani wauhnin manah ki, truknin dini as dutni ki; pukta kat bik kulnin kidika yakurupdas ki. ¡Dawak adika bik sihm alas dauh manah ki!

²⁴Muih di yamnin kidika laih di kaswi dawak diwa atnin ki; dawak witing warkni minik kidika kau alasna duna atnin ki, bahang amanglanayang adika dini bik Papang kaupak kaiwa kidika.

²⁵Kat, ¿angdika muihni di kaswarangyah, kidik awaskat alasna duwarangyah, Papang kaupak awaskat?[2]

²⁶Kaput bahang, Papang laih sins lani tuhni, amanglanin dawak alasna bik kalawi angdika muihni witing minikpa yakat yamni kaltalwa kidika yakat; kaunah angdika muihni dutni yamwa kidika laih baraknin lani dini truknin tikini kidika kalawi dawak di minit nunuhni balna kidika uduhwi usnit kat angdika muihni witing minikpa yakat yamni talwa kidika yakat kalana atnin yulni. ¡Adika bik sihm yul as dauh ki dawak wing kidika laihnin yamda kapat as ki!