Read Mayangna Eclesiastés 3 Bible Online

Eclesiastés 3 - Mayangna bible

Eclesiastés 3

¹Adika sauni akat laih di balna bitik kidika mani duwi; di balna kalahwa bitik kidika mani duwi:

²Batahnin mani sak ki, dawak daunin mani bik sak ki. Dahnin mani sak ki, dawak dahna kidika dutnin mani bik sak ki.

³Inin mani sak ki, dawak laihwi yamni kalyamnin mani bik sak ki. Bahwi daukalnin mani sak ki, dawak laihwi yamnin mani bik sak ki.

⁴Kaidinin mani sak ki, dawak karinin mani bik sak ki. makulnik buknin mani sak ki dawak alasna dunin mani bik sakki.

⁵Kipala ranin mani sak ki, dawak ananin mani bik sak ki. Kalwakaihnin mani sak ki, dawak kaldakwi kalahnin mani bik sak ki.

⁶Traitalwi yamnin mani sak ki, dawak danin kidika mani bik sak ki. Apaknin mani kidika sak ki, dawak ruhmnin mani kidika bik sak ki.

⁷Bisnin mani kidika sak ki, dawak binin mani bik sak ki. Ap atnin mani sak ki, dawak yulbaunin mani bik sak ki.

⁸Dalani talnin mani sak ki, dawak dutni talnin kidika mani bik sak ki. War kalbaunin mani sak ki, dawak kulnin aslah kalahnin mani kidika bik sak ki.

⁹¿Muih kidika ais yakwih wark kalahna manah?

¹⁰Amanglatayang Papang yaklau muih balna minitnayak truknin dini ilna kidika karak sau yakat dilakna atnin yulni.

¹¹Witing yaklau, kidika minitni yakat, di balna bitik kidika yaksihni nuhni yamna; baisa kidika minit yakat muih kulnin yak āna kulwi kuihwas ban tanityak kiwa kidika, baisa muih kidika sinsni bitik kau uiwi kuihwi amanglawas kat Papang yaklau di yamna kidika dawak di yamwarang kidika yakat bik.

¹²Yang amanglatayang muih di yamwarang kidika laih sangnika yakat alasna manah duwarang ki,

¹³bahang di kasdi dawak didakat, dawak bik lakdi taldakat mawarkki balna kaupak di yakda kidika, kidika laih Papang yaklau mayana bahang kaput ki.

¹⁴Dawak bik amanglatayang Papang yaklau di balna yamna kidika laih ban kaput karang ki. Di as bik diski minitlakna atnin dawak bik dakyakna atnin; Papang yaklau kaput yamna, witing niningyakat rispik nuhni yamna atnin yulni.

¹⁵Di as bik diski muhnilau kau dis dai dini kidika, dawak di as bik dis karang ki uman dis dini kidika. Papang yaklau yamwi di bayakna dini kidika watwi lamwi kaina atnin.

¹⁶Adika sauni akat bik talnayang daukalnin lani dawak dutni lani kidika bik duwa kidika, la kat atnin lani dawak barangni atnin lani kidika bik duwa atnin dai kidika pāni yakat.

¹⁷Kaput bahang yultayang Papang yaklau lani yamwarang ki muih yamni kidika yakat dawak dutni muihni kidika bik, kat minit as sakki di balna bitik kalahwa kidika dawak di balna bitik yamnin kidika bik.

¹⁸Aput bik yultayang, muih di yamwa kidika niningkauh laih, Papang yaklau wauhnin dini balna kidika yakat āwi muih balna kidika witingna amanglana atninna witingna bik sihm didauh balna kapat kidika.

¹⁹Rahm kidika laih, muih dawak didauh balna kidika bik sihm pāni yakat uiwarang ki: buas balna dawak ūk balna kidika bik sihm kapapat dadauwi, dawak sangnika kidika laih sihm kidika sangnika duduwi bitik kau. Muih kidika di as bik minitkau diski didauh kidika karak: bitik laih alas dauh manah ki,

²⁰dawak bitik kau sihm kidika pāni yakat uiwi wawatwi; bitik kau laih sau kau diyamna dai, dawak bitik kau bik sau kakalna karang ki.

²¹¿Wais barangni yulnin sipyah muih spiritni kidika makau kisang balna yakat kilwa kidika, dawak didauh spiritni kidika laih sau dinityak yaklakwa kidika?

²²Amanglanayang di yamni ūk diski muih niningyak witing warkni kidika kau alasna duna atnin, kat kidika manah kalwatwa bahang, kat muih as bik duaiwi niningkawas karang ki witing dauwarang usnitkauh ais kalahwarang kidika.