Read Mayangna Eclesiastés 4 Bible Online

Eclesiastés 4 - Mayangna bible

Eclesiastés 4

¹Usnit kat yang kultik talnayang adika sauni akat taihnin lani yayamwa kidika. Dawak talnayang taihna muihni balna kidika kakaidak, kaunah muih as bik diski walanina ānin; ditataihwa muihni balna kidika yaklau dutni diyayamwi, kaunah muih as bik diski walanina ānin.

²Kidika bahang uman dadauna balna kidika yakat alasna dikulnayang dai baisa sangka balna kidika karak dawakat,

³adika balna bu laih yamni kaunah, baisa batatahnwas balna kidika bangki, bahang witingna laih baisa tatalwas ki adika sauni akat di dutni yayamwa kidika.

⁴Aput bik talnayang wark parasni kalahwi dawak wark pāni as kau yamni atnin kidika biri biri tumnin lani kalahwi, dawak adika dini bik sihm alas dauh manah ki, sihm wing kidika laihnin yamda kapat as ki.

⁵Muih balna laih aput yuyulwi: “Tapdadas muihni kidika laih kalwakuih dawi witing alas kaldaukalwi.”

⁶Kaunah yang laih yultayang: “Baisa yamni ki taim parahni bin yakurupdinin kidika dawak taim naini yakurupdi wing kidika laihnin kapat yamnin karak dawakat.”

⁷Pining yakat wirlawanayang kat adika sauni akat alas lani dauh ūk as talnayang dai:

⁸muih al as alas, kaltalyang yamni dis, walanibis dis, wirahni bik dis kidika, minit as bik yakurupdas ki dawak bik kallunglakwas ki ritsni balna kidika yakat lakwi talna manah, dawak aput bik yulwi dakawaski: “¿Dawak wais yulni wark parasni yamtayang? ¿Ais yulni diki yayamni balna kidika pulihtayang?” Bahang adika bik sihm alas dauhmanah ki dawak truknin dini as tikini ki.

⁹Baisa yamni ki as dawak bu karak dawakat, bahang warknina kaupak di nuhni yayakwi.

¹⁰Dawak witingna kaupak as bukwarang mani kat, ūk kidika yaklau laihwi dulauwarang ki. ¡Kaunah alakaih angdika muihni witing alas likkauna bukwa kidika, bahang muih as bik dis karang ki kallaihwi dulauna atnin!

¹¹Baisa kidika minityak, muih bu libitni kalalangwarang kat, biri biri daihni kalyayamwi; kaunah aslah karang kat, ¿amput daihni kalwarangyah?

¹²Muih alas laih sipki minit bayakna atnin, kaunah muih bu laih sipki niningyak yaklauna atninna. Dawak kidika minityak, trit wahni bās kidika isi awas ki dakna atnin.

¹³Uk yakat laih, baisa yamni ki wahma as minikunni kaunah sins nuhni duwa kidika dawak king muihbarak tapdadas karak dawakat, kat adika laih yul sumalnin yulni balna diski.

¹⁴Wahma kidika usnit kat kidika kingni pāni yakat king kawarang bik, silak ūni kaupak trun yakat kilwarang bik, kidik awaskat minikunni kaupak king kawarang bik, adika sauni muihni balna yaklau ilp kalalawa kat talnayang dai.[3]

¹⁶Dawak tawan muihni balna kidika mahni minitna yakat king kawarang bik, witingna yakat dawak sulanina balna yakat bik isningnalak didawas karang ki. Dawak adika bik sihm alas dauh manah ki dawak wing kidika laihnin yamda kapat as ki.