Read Mayangna Eclesiastés 5 Bible Online

Eclesiastés 5 - Mayangna bible

Eclesiastés 5

¹Papang ūni yakat yawama mani kat, di yamtaman balna kidika amungtalah: sakripais balna yamnin pāni yakat sihm muih mutu yamwa kapat dutni yamwa kidika amanglawas dawi, yaihnityak yawa yulni kat dakah.

²Sirihni palni, kungmamak balna dawak sinsma kau bik Papang yakat pramis yamwinih, kat Papang laih makau kisang yakat sakki dawak man laih sau akat sakman. Kidika bahang, ais sipman kidika manah yultah,

³kat uba yul kulda mani kat, makulnik kidika trabil dudi, dawak uba yulbaudak bik yul dauh balna manah yuldi.

⁴Papang yakat pramis as yamma mani kat, yamwas laih atnah, kat witing laih tapdadas balna kidika yamni talwas ki. Ais pramis kalyamtaman kidika kat yamtah,

⁵bahang tanit yamni ki pramis yamwas atnin, dawak pramis yamwi kidika kat yamwas atnin karak dawakat.

⁶Datang kat kungmamak balna kidika yaklau mayayamwak dutni yamwinih, dawak usnit kat Papang yaklau sihna muihni kidika muhni yakat yulnam mistik alahwa yamnaman. ¿Ais yulni yamdakat Papang yaklau kulnin daukalwarangyah yul balna yultaman kidika yulni dawak bik daukalwarangyah di yamnaman kidika?

⁷Kaput bahang, trabil balna manas, yul balna mahni dawak di balna sinsni lani dis balna kidika pasyakat, man laih Papang niningyak rispik nuhni yamnam ki.[4]

⁸Muihsak kapat malaihnin awaski, sau as kau talang muih minikunni yakat taihwi duwak dawak la kat kidika yakat dawak muih rahmni yakat bik dutni yayamwak, kat kalbauyang tunan nuhni as kidika tunan muihni nuhni ūk yaklau yulni malwi, dawak ūk balna tanit nunuhni kidika yaklau kidika bu balna kidika yakat yulnina mamalwi.

⁹¡Dawak kidika ki sau baraknin kidika dawak king kidika laih di dahnin pāni wark kalahwa kidika![5]

¹⁰Angdika muihni lalah yakat dalani talwa kidika laih, baisa mahni dukih kalawi; angdika muihni sau ritsni balna yakat dalani talwa kidika laih, wat as bik kulwas ki mahni dunin kidika. Adika bik sihm alas dauh manah ki,

¹¹kat mahni duda mani kat, mahni palni disdi. ¿Dawak ais duwarangyah kidika minityak ūk duda kidika yakat lakdi taldinah?

¹²Wark kalahwa muihni kidika laih, di dibin kidik awaskat mahni kaswa karang bik, witing laih ban kaput yamni kami; di duyang kidika laih, nawatkauh, witing ritsni balna kidika yaklau kalyayamwak yamni kamas ki.

¹³Rahm palni adika sauni akat di dutni as talnayang: rits balna uduhnin kidika laih daniwan nining yakat dutni kiwi,

¹⁴kat lalah warkni dutni as yaklau sip ki kidika ritsni yakat dispamna atnin, dawak witing walabis al duwa karang kat, usnit kat di as bik dis karang ki walanibis yakat kalana atnin.

¹⁵Dawak sau akat amput kaiwi kalahna dai kaput, watwi kaput nawatwi kiuna karang ki: wahnidis palni sihm batahndana dai kapat, dawak di as bik duwi kiwas karang warkni balna minik kaupak.

¹⁶Adika laih rahm dalani palni ki: sau akat amput kaiwi kalahna kaput nawatwi kiwarang kidika. ¿Dawak wark mahni yamna kidika kaupak ais yaknayah?

¹⁷Dutni kidika laih, witing sangnika bitik kidika puksani pasyakat manah bayakna,[6] dawak kulnin trabil dawak dalani balna karak bik.

¹⁸Yang waltik yaknayang di yamni kidika laih di kaswi dawak dinin kidika manah ki, dawak adika sauni akat wark kalahwi kidika kaupak alasna dunin kidika manah ki Papang yaklau masangkika parahni mayana yakat, bahang mayang laih kidika yamnin maiwatna.

¹⁹Dawak ūk yakat laih, Papang yaklauwi angdika muihni balna yakat rits minitbayak diawa kidika, kidika kaupak di kasna atnin dawak bik dina atnin kalawi, bahang wark mahni kaupak alasna dunin kidika laih Papang kaupak kaiwi.

²⁰Dawak Papang yaklau witing isning yakat alasna kidika āwi bangwa bahang, witing tanityak sangnika kiwarang kidika yulni kulwi kalbauwas ki.