Read Mayangna Eclesiastés 6 Bible Online

Eclesiastés 6 - Mayangna bible

Eclesiastés 6

¹Adika sauni akat muih pasyakat dutni ūk sakki, kaput laih sipyang dai talna atnik:

²Papang yaklauwi muih buas yakat sau ritsni minitbayak dawak yaringni bik diawi, dawak witingna dukih diawa dini kidika dis laih awaski; kaunah kidika balna kau alasna duninna laih diawaski, kaunah muih ūk balna yaklau alasna duduwi. ¡Adika bik sihm alas dauh manah ki dawak bik dalani palni ki!

³Muih al as kidika walabis andat as dunin sipki dawak kurih mahni sangka atnin; kaunah ma mahni sangka karang bik, di yayamni kidika karak alasna duwas karang kat, dawak sauni ū kat bik duwas karang kat, yang kultayang muihbin as nanangni bani paskaupak dauwi kalahwa kidika kauh baisa nuhni kulna ki kidika muih al karak dawakat.

⁴Bahang kidika muihbin dauh diswarang kaunah, puksani yakat, ayangni kidika laih muih as bik amanglawas karang ki,

⁵dawak ma kidika talwas dawak di as bik amanglawas karang bik, witing kauh naini yakurupdana karang ki muih al kidika karak dawakat,

⁶kidika muihni laih sip dai kurih tausin bu sangka atnin, kaunah dini yayamni balna kidika kaupak laih alasna duwas. Dawak witni kat, ¡bitik laih sihm kidika pāni yakat uiwi!

⁷Muih kidika laih wark kalahwi dawak kalahwi di kasna atnin yulni, kaunah sip isninglak laih kaldakawaski.

⁸¿Sins duyang muihni kidika ais dini duwih tapdadas muihni dis dini kidika, witing sinsni lani balna[7] karak sangnika kidika nanitdakna atnin?[8]

⁹Tanit yamni ki di talda kidika dawi kulda kidika karak dawakat. Kaunah adika bik alas dauh manah ki, kidika laih wing kidika laihnin kapat as yamdi.

¹⁰Warmani di balna kalahna kidika laih, ma mahni bayakna ayangnina duduna kidika, dawak amangladi angdika kidika. Muih as bik sip kalbauwas ki witing minitkauh parasni duwa kidika yakat.

¹¹Di aslah laih rahm ki: angdika pāni yakat yul balna minitbayak kidika laih, yul pini manah kidika bik minitbayak ki; dawak kidika karak di as bik yakdas ki.

¹²Kaput bahang, muih as bik amanglawas ki ais dini kidika yamnipa muih niningyak adika alas dauh mani balna kulkilah witing sangnika duwa yakat. Witing mani balna kidika laih sihm sanni as bayakwa kapat bayakna karang, ¿dawak wais yaklau kalyulnin sip karangyah witing dauwarang usnitkauh di kalahwarang kidika?