Read Mayangna Eclesiastés 9 Bible Online

Eclesiastés 9 - Mayangna bible

Eclesiastés 9

¹Adika dini balna bitik yakat yang āwanayang, amanglana atnik manah yulni muih yayamni balna dawak sins duyang balna warknina kidika laih Papang tingni yakat ki. Muih kidika dalani lani dawak dutni kulnin lani kidika bik di as bik amanglawas ki, minikpa yakat talwa karang bik.

²Witni kat, bitik kau laih sihm dini kidika tanina āwi: la kat muihni kidika dawak la kat awas muihni yakat bik, yamni muihni yakat dawak dutni muihni yakat bik,[11] maisihni dis dawak maisihni karuk muihni yakat bik, sakripais buswa dawak sakripais buswas muihni yakat bik; yamni muihni dawak dutni yamwa muihni kidika bik, pramis yamwa dawak pramis yamwas muihni yakat bik sihm kapat.

³Adika ki dutni kidika di balna bitik kalahwa pasyakat: bitik kau laih sihm kapat taninaāwi. Uk yakat laih, muih kulnin kidika laih di dudutni manah bahngna ki; sins dis lani kidika yaklau sinsni kidika taihwi duwi sangnika bitik yakat; dawak witni kat, ¡sau ū yakat kiwi!

⁴Baisa tahanin laih duwi angdika muihni sangka atnin kaldakawa kidika, bahang tanit yamni ki sul as sangka kidika dawak layan dauna kidika karak dawakat.[12]

⁵Baisa kidika minityak, sangka balna kidika laih amanglalawi witingna dadauwarang kidika, kat dinitnakahna bahang.

⁶Kidika yakat witwi witingna dalani lani, dutni kulnin lani dawak muihnina nuhni dukih diawa kidika bik, dawak witingna watwi duduwas ki adika sauni akat di balna yayamwa kidika yakat.

⁷Bahang alasna dutah kasnin dini kastaman kidika kau; wain ditaman kidika kau alasna dutah, kat man di balna yamnaman kidika laih Papang yamni talna bahang.

⁸Asna pipihni manah āwah; tunama yakat kahnin dini walapni kidika ban kaput kahtah.

⁹Man yal dalani talaman kidika karak alasmana dutah sangmaka yakat, minit bitik yakat adika sangnika akat sinsni lani dis Papang yaklau adika sauni akat mana yakat; kidika manah yakma ki adika sauni akat wark alahwaman kidika kaupak.

¹⁰Dawak man tingma yakat di balna bitik yamnam dini kidika; yamkih palni yamtah; kat sau ū yakat, man yawa watma kidika, di yamnin dini as bik diski dawak kulnin dini as bik diski, amanglanin dawak sins tuhni bik diski.

¹¹Adika sauni akat di ūk bik talnayang: siririhni balna kidika minit bayayakwas ki kirinin yakat, dawak kulninna dadasni balna kidika bik minit bayayakwas ki kalbaunin yakat; kaput bik sins duyang balna kidika kasnin dini kidika ban kaput atnin duduwas ki, dawak sinsnina siririhni balna kidika bik di duyang awaski, duwak sumamalna muihni balna kidika bik muih yaklauwi yamni diduduwaski; witingna bitik laih minit as suerte kidika tahahawi.

¹²Uk yakat laih, muih as bik amanglawas ki mampat mani witing awarni kiwi kawarang kidika: waspa dini balna kat waspa dini laihnin dini yakat kakawa kapat dawak di lawani duduwa balna kat laihnin dini yakat bubukwa kapat, sihm kaput bik muih kidika, witing isning aiwas kat, minit dutni as kau kana ki.

¹³Adika sauni akat di ūk bik talnayang kidika laih sins lani nuhni sumalnin kapat talayang:

¹⁴tawan nuhni dibin as, muih bulah karak, kidika laih king parasni as yaklau dikalbauwi kidika tawanni bin yaihnityak kalbaunin dini nuhni as dulauwa kidika.

¹⁵Dawak kidika tawanni nuhni yakat muih al minikunni as yalahwi, kaunah sins duyang, witing sinsni tuhni karak sipdai tawan nuhni kidika laihwi yakna atnin, ¡dawak muih as bik witing yakat kulwi dakawas ki!

¹⁶Kaput bik, yang lawik barangni yultayang tanit yamni ki sins duyang atnin dawak kulnin dadasni atnin karak dawakat, muih al minikunni sinsni tuhni kidika kulwi dakawas dawak ais yulwa kidika yakat bik tapayuwi dakawas atnin karang bik.

¹⁷Sins duyang balna yulnina yayamni kidika kauh baisa kalahwi tapdadas balna kingnina sarahwa kidika karak dawakat.

¹⁸Sins tuhni kidika kauh tanit yamni ki war kalbaunin dini balna karak dawakat. Mistik as kidika manah di nunuhni palni daukalwi.