Read Mayangna Cantares 1 Bible Online

Cantares 1 - Mayangna bible

Cantares 1

¹Yul damni tanit yayamni ulna kidika Salomón.[1],

²¡Kungmamak kau yaumtah! Yaumta yasalaptaman kidika laih tanit damni ki wain karak dawakat,

³manangkitak yakat walapni palni ki kalkahtaman dini kidika, man ayangma laih di walapni utuhna. ¡Kidika bahang yayal balna kidika dalani matatalwi!

⁴¡Sirihni yaduyawah! ¡King, man payahtaman pāni yakat yaduyawah! Man karak laih albu alasna mawarang; makulnik yakat dudarang, wakaihta umtaman kidika wain kapat tanit. ¡Kapat bahangpa yayal dalani matatalwa kidika!

⁵Jerusalén yayalni balna, yang ukitak laih sani ki, kaunah nuhni yaksihn yang; saniyang sihm cedar ūni lababanni kapat, nuhni yaksihn yang sihm Salomón winnidar asnina balna kapat.

⁶Yang saniyang kidika laih talwinih, ukitak, ma daihni busna kidika yakat bik. Wirahki ahal balna nikingkauh ahanna dawak wain yamak maintalnin yapapakna, ¡dawak yang wain ki yamak palni kidika maintalas danayang!

⁷Yayultah, sangkika kau dalaniman kidika, ¿angkat sīpma balna duyawang di kakaswih? ¿angkat duyawang ururupwih matunak kidika? ¿Ampadawak pini awaihyang muihni kapat lik-awakiyah,[2] man karak kaltalyang yamni balna tingninalau yaihnit yakat?

⁸Man amanglatasman kat, nunuhni yaksihn balna pasyakat nuhni yaksinh man kidika, sīp balna uina munah yawah sīp maintalyang balna ūnina labanni yaihnit yakat.

⁹Man laih yang diki man, dalani matalayang kidika, Fero kārni mumurwa aniras balna sasani kapat man.

¹⁰¡Muhma kihnimak kidika ampat yaksasihn yah atai kidika walsah yakat! ¡Damamak kidika amput yaksihnyah alah alahtaman kidika kipala dahlwa balna!

¹¹¡Alahnin dini kidika gol karak yamtik maki lalah minit yakat iltik birtik maki!

¹²King kidika tibil yakat yalahwakat, yang kalkahtayang dini walapni kidika purnimanah dawi.

¹³Yang dalani talayang alni kidika laih pan yani walapni kapat ki yang taki walsah kau sakkidika.

¹⁴Dalani talayang alni kidika laih sihm alheña puluni kapat ki En-gadi kau wainni yamak balna kidika.

¹⁵¡Ampat nuhni yaksihnmahn, dalani matalayang man kidika, ampat nuhni yaksihnmahn! ¡Mamakpa kidika laih buhtuku bu ki!

¹⁶¡Amput nuhni yaksihnmahn, dalani matalayang alni ampat nuhni yaksihnmahn! ¡Dibasta sangni kidika laih mayang malangwinin pāni!

¹⁷Suhun kidika balna laih ūni lani balna, dawak ūni minit yakat mukna kidika laih awas pauni.