Read Mayangna Cantares 2 Bible Online

Cantares 2 - Mayangna bible

Cantares 2

¹Yang laih Sarón wanilang dinipuluyang, dawak bik langni dinipuluyang.

²Dalani talayang yalni kidika laih yayal balna pasyakat, dipulu as, wakal paskau kapat ki.

³Dalani talayang alni kidika laih ahal balna pasyakat, manzana minik as kapat ki, panpas yakat. ¡Ais amput yamniyah dinitkau sanni yakat yalahnin! ¡Witing minik kidika ampat damniyah!

⁴Di kakaswa pāni yakat yaduwi kiuna witing minikpa yatalwa kidika dalani manah bunghdai.

⁵¡Kuruhwi dawi pasas karak āwi busna kidika karak kulnik dulautanauh, dawak manzana yabayahtanauh, kat dalani talnin kidika kau dautayang bahang!

⁶¡Witing wadahni kidika tunaki yakat āwahng, dawak tingnipal kau yawakaihwang!

⁷Jerusalén yayalni balna, pramis yayamtanauh, asangpas kau sana balna yulnina, dalani talayang kamatus kidika uswi sahmumuhwinih. ¡Datanang kamang mampat sahmuhwarang kat!

⁸¡Dalani talayang alni kidika kaiwi! ¡Witing dinit yulbauwa kidika uman dakayang! Asang minit munah sutwi kaiwi, asang ububulni binina minit munah sutwi kaiwi.

⁹Dalani talayang alni kidika laih sana kapat ki: sana dibin as kapat ki. ¡Uman akat kaina sakki, dūr piningyakat, windar munah talwi, sulihni munah yakpakdi talwi!

¹⁰Dalani talayang alni kidika yayulna: “Lawah, dalani matalayang yalni; lawang mawang.

¹¹¡Talah! Wasma laih bayakwi kiuna kidika karak waslauwa balna kidika bayakwi kiuna.

¹²Dipulu balna kidika uman sahna, unbaunin mani kidika kaiwi kana, mayang masauki akat uman dakadi wahng binina unbabauwakat.

¹³Ani damni kidika uman minik duwi, dawak wain yamak kidika walapni yakwi. “Lawah, dalani matalayang yalni; lawang mawang.

¹⁴“Buhkituku, kipala walsah yakat maldaman kidika, yakmaldinin makau yakat, datang muhma talkuh, datangkat damat kidika dakakuh. ¡Matalik yamni dakayang! ¡Madakanin kidika laih damni ki!”

¹⁵Wassala yayal kidika laihtanauh, wassala yayal kidika, mawainki yamak daukakalwa kidika, baisa puluni duwa kauna kat.

¹⁶Dalani talayang kidika laih yang diki, dawak yang laih witing diniyang. Witing sīpni balna kidika laih dipulu walsah yakat maintalwi.

¹⁷Ma kilwakat, sanni masanni balna kidika dis kalwi. Dalani matalayang alni, nawatta aiwah; sana kapat awah, sihm sana bin kapat asang wakarhni yakat.