Read Mayangna Cantares 4 Bible Online

Cantares 4 - Mayangna bible

Cantares 4

¹¡Amput nuhni yamni mahn, dalani matalayang kidika! ¡Amput nuhni mahn! Mamakpa laih buhtuku bu ki tunan mukwa pining yakat yakmaldana sakki; basma laih kuts binina kapat ki Galaad asangni kau yakisda kapat yamwa kidika.

²Anama balna kidika bitik laih yayamni manah, sihm sīp uduhna as kapat ki wisam palni waskanin pāni kaupak kalalahna kidika ridi kidika butunina kahrnin.

³Kungmamak laih papauni ki, sihm trit pauni kapat, yulma balna kidika makulnik laihwi. Muhma kihnimak balna laih granado minik upuna bu kapat ki tunama muktaman piningkau kidika.

⁴Damamak kidika laih sihm kapatki kipala pahrna karak, makau kilwi talnin pāni yamna kidika, Devid dini yayamna kidika. Kidika yakat, kalbauyang balna nanitna daknin tausin as alahna bangki, kulninna parasni balna nanitna daknin.

⁵Man tama kidika sana binina bu kapat ki sūtki kapat, dipulu paskau dibasta kakaswa kapat.

⁶Ma payahlawak, ma sanni kidika kiri, mirra asangni yakat yawaki, dawak walapni bubuswa asangni ubulni yakat bik.

⁷¡Man laih nuhni yaksihn man, dalani matalayang kidika, nuhni yaksihn man tunama kaupak kalma sutni kat! ¡Man muihma yakat wayakani as bik diski!

⁸Líbano kaupak yang karak lakyawa, yalki awama kidika; yang karak lakyawah Líbano kaupak. Langni kidika talah, Amana asangni tuna kaupak, layan balna panina sulihni kaupak, dawak nawah bulni balna asangnina kaupak bik.

⁹Yamalnaman ising kidika, wirahki yal bin, yang yalki awama kidik; yamalnaman ising kidik wat aslah yatalnaman kamanah, dawak alahma wahni, bani aslah kau.

¹⁰¡Ais ampat yamni yah laihta salapta umtaman kidika, wirahki yal bin, yalki awama kidika! ¡Laihta salapta umtaman kidika kauh damni ki, wain karak dawakat, dawak walapni kahtaman kidika tanit walapni auhni ki, walapni ūk balna bitik pasyakat!

¹¹Yalki awama kidika, kungmamak kaupak amak manah kalahwi. ¡Amak dawak tāwas manah duwi tuma dinit yakat! ¡Líbano walapni duwa kapat asmana kidika walapni duwi!

¹²Man wirahki yal bin, yalki awama kidik, dipulu dahna pāni daklana kapat man, wastuna putna kapat dawak was burhwa putna kapatman;

¹³dipulu dahna pāni kaupak granado panan ukuswi kalahwa kidika minik ahauhni; dipulu dahna pāni kau alheña puluni[3] duwa kidika,

¹⁴nardo dawak azafrán, suku walapni dawak canela, dawak pan satni balna kaupak busnin walapni yayakwa kidika; ¡walapni duduwa tanit yayamni balna bitik!

¹⁵Dipulu paskau wastuna kidika laih pa kuhrna as ki, bahang kidika kaupak buhrwi kalahwi wasni, Líbano kaupak yaklakwi kiwa kidika.

¹⁶Tingpal wingni, ¡sahmuta! Wadah wingni, ¡akat aiwah! ¡Dikipulu dahnayang pāni yakat puhtang walapni kidika kalahwang! Aiwah, dalani matalayang man, dimapulu dahna pasyakat, dawak kasta minik auhni duwa kidika.