Read Mayangna Cantares 5 Bible Online

Cantares 5 - Mayangna bible

Cantares 5

¹Uman dikipulu dahnayang yakat yawik āwanayang, wirahki yal bin, yang yalki awama kidika. Umani pan yani walapni, dawak walapni ūk balna kidika dunayang, duwak uman amakki ūni kaupak wasni yakna kidika dattik dakana yang, kaput bik uman, wainki dawak takiwas kidika bik dinayang. Kaltalyang yamni mayang balnamana, kastanauh dawak ditanauh, ¡ditanauh ampus dukih manawa yakat!

²Yang laih amayang dai, kaunah putki minik laih kamas ki. Dawak dakanayang, dalani talyang kidika muihni dūr yakat yulna dai: “¡Ya apahta, dalani matayang kidika; wirahki yal bin, buhtuku sirau al talwas! ¡Baski kidika diwas manah suihni ki! ¡Pukta diwas kalahwa kidika baski munah kiri!”

³“Uman askina yakpamnayang; ¡wattik askina awinik ki! Uman kalki suhnayang; ¡watwi kalki kidika sau yahamni yalaihwarang!”

⁴Yang dalani kaltalayang kidika tingni uhr'āna, dūr kau sulihni yakat tingni urh'āna. ¡Kidika yulni muihki bitik laih yaisihna, tuhni palni!

⁵Kaput laih lawanayang dalani talayang yakat dūrni apahnik. Tingki balna, dawak tingni bikisni kaupak, pan yani walapni kidika tahwi bukna dai, dūr uhrlawa panani minit yakat. ¡Yul bauwak dakayang kidika dautayang kapat kaldakamayang! Dūr apahnayang dai, dalani kaltalayang yakat, kaunah witing yakat baisa sak awas dai. Walnayang, kaunah sip yaktas danayang, kalyulnayang kaunah nangkitlawas dana.

⁷Kalpaknayang dai, tawan nuhni pasyakat awaihwi maintalwa muihni balna karak; yababauna, muihki yakat yadadakna dai; ¡tawan nuhni kiwi kawa kau maintalyang muihni balna yaklauwi tunaki muktayang asnina kidika yadakyayakna parasni palni!

⁸Jerusalén yayalni balna, dalani talayang muihni kidika kalpaktanama kat, kalyuldarang ki yatinauh yang laih dalani talnin kidika kau dautayang.

⁹¿Dalani talaman kidika ais tanit yamni duwih, nuhni yaksasihn pasyakat, nuhni yaksihnman kidika? ¿Dalani talaman kidika ais tanit yamni duwih, dawak yanayultaman pramis as manyakat yamna atnikna?

¹⁰Yang dalani talayang kidika laih unitak pihni ki sip diswas ki ahal tausin pasyakat.

¹¹Witing tunan kidika laih gol aihwa manah ki; basni kidika diwiwinni ki, dawak sani kuparis kapat ki;

¹²Minikpa kidika laih buhtuku bu tāwas kau wassina kapat ki, was daklana kung yakat kilna rau kidika;

¹³Muhni kihnimak kidika, dipulu dahna pāni kau dipulu walapni duwa kapat ki. Kungnimak papauni ki, bahang kidika munah walapni tahwi;

¹⁴tingni balna kidika ting sitnin gol kau yamna dawak minit yakat kipala lalahni karak utuhwi lana kapat ki; witing muihni kidika laih marfil buhwi salaini yamwi minit yakat kipala sangni karak kahwi lana kapat ki;

¹⁵barahnimak balna laih marmol kapat, dawak gol kau rahni balna āna kapat; wayani kidika laih satuk palni ki, sihm Líbano suhunni balna kapat;

¹⁶Ahnipara kidika laih damni palni ki. ¡Bitik laih, witing kidika yaksihni palni ki! Yang dalani talayang alni kidika laih kaput ki kaputki dalani talayang alni kidika, Jerusalén yayalni balna.