Read Mayangna Cantares 6 Bible Online

Cantares 6 - Mayangna bible

Cantares 6

¹¿Angkat kiwadah, dalani talaman muihni kidika, nuhni yaksihn yayalni balna paskau, nuhni yaksihn kidika? ¿Angdika niningyakauh kiuna yah? ¡Man karak kalpakdi mawi waldarang!

²Dalani talayang alni kidika dinipulu dahna pāni yakat kiuna, dinipulu dahna pāni walapni, tingnilau balna maintalwi dawak dipulu daknin bik.

³Yang laih dalani talayang muihni kidika dini yang, dawak witing laih yang diki. Witing laih tingnilau balna maintalwi dipulu pasyakat.

⁴Man dalani matayang muihniman kidika, man laih nuhni yaksihnman dawak mamiklataman, Tirsa dawak Jerusalén tawanni nunuhni kapatman; sip niningkauh yaklauwas, kalbauyang balna lapakwi uiwa bangkapat.

⁵¡Yatalaman kidika datah mamakpa kidika mikit bayakna! Basma balna kidika, kuts binina kapatki Galaad asangni kau susutwa kapat.

⁶Anama balna kidika bitik yayamni manahki, sīp binina wisam palni was sīwi yakmukna kapatki mahka butunina daknin kat.

⁷Muhni kinimak kidika pan minik yamni lalahna kapat ki, tunama muktaman dinit yakat yakmamaldi.

⁸King yayal balna kidika laih 60 ki, dawak ialni balna kidika laih 80 ki, dawak sirarau ūk balna laih mahni palni ki,

⁹kaunah yang buhkituku al kalpakwas kidika laih aslah ki; walanibis yal dalani talwa kidika laih aslah ki kidika yalni walanibis yakna kidika. Sirarau balna kidika talwi, witing yakat alasnina yayakwi; king yalnina balna dawak ialnina kidika balna bik ayangni dulalauwi.

¹⁰¿Waisyah duhng kalahwi talwa kidika sihm mapiris ma yaringni kilwa kapat? Kidika laih nuhni yaksihn ki waiku kapat, yaringni ki ma kapat, ¡sip niningkauh malawas ki, sihm kalbauyang balna mahni lapakwi uiwa kapat!

¹¹Nogal panani manah asangnipas yakat yawanayang talna atnik was bin sangni murwa kidika yakat; wain balna sahwa kidika talkih yana dai dawak granado panan kidika puluni balna bik.

¹²Kidika usnit kat amanglatas danayang dai ais kalahnapa amanglanayang kar as pasyakat rauyangna dai king walanibis dalani talayang kidika karak.[4]

¹³¡Nawatta aiwah, Sulamita, nawatta aiwah! ¡Nawatta aiwah, matalkih mayawi! ¿Ais kidika talkih manawih Sulamita yakat? ¡Ubunin as, ū lababanni kau ububuwa kapat!